БНХАУ-ын нийслэлд болон тус улсын хойд нутгаар даваа гарагт сүүлийн 10 жилд үзэгдээгүй шороон шуурга дэгдсэний улмаас олон зуун нислэгийг цуцлахад хүржээ.
Харин уг шуургыг Монгол, Өвөр Монголд шөнө дэгдсэн хүчтэй салхинаас үүдэлтэй гэж Бээжинд төвтэй байгаль хамгааллын мэргэжилтэн Жоу Жиньфэн мэдээлсэн байна.
БНХАУ-д даваа гаргийн үдээс өмнө замын түгжрэл үүсэж, нийслэлийн үндсэн хоёр нисэх буудлаас гарах 400 гаруй нислэг цуцлагджээ. Мөн Бээжингийн төв дэх тэнгэр баганадсан барилгууд шороо элсний улмаас бараг харагдахаа больжээ.
Баруун нутгийн цөлийн элс зүүн нутаг руу салхиар туугддагтай холбоотойгоор ийм шуурга хаврын улиралд түгээмэл тохиолддог байсан бөгөөд зарим үед Японы хойд нутагт ч хүрдэг байжээ.
Харин цөлжилттэй хэсгүүдэд олон тооны мод бут тарьснаар шуурганы эрчийг сулруулсан боловч хот, аж үйлдвэрүүд өргөжин тэлж буй нь орон даяарх хүрээлэн буй орчинд байнгын сөрөг үр дагаврыг учруулж байна.
Цаг уурын үндэсний хүрээлэнгийн мэдээлснээр, элс шороо баруун хойд нутгийн Шинжаанаас зүүн хойд нутгийн Хар мөрөн, зүүн эргийн боомт хот болох Тяньжинь зэрэг 12 муж, бүсийг дайран өнгөрөх төлөвтэй байжээ.
Бээжингийн утааг бууруулах чиглэлд хүчин чармайлт гаргаж буйг үл харгалзан саяхан агаарын чанар буурсанд шуурга холбоотой эсэх нь тодорхойгүй байна.
“Цар тахал дэгдээд буй энэ цаг үед дэгдсэн шуурга биднийг зан төлөвөө өөрчлөх хэрэгтэй гэдгийг сануулсан өөр нэгэн томоохон сургамж боллоо” гэж Жоу Жиньфэн хэлжээ.
Эрх баригч Коммунист нам ирэх таван жилийн хугацаанд эдийн засгийн гарцын нэгж тутамд нүүрстөрөгчийн давхар ислийн ялгарлыг 18 хувиар бууруулах амлалт өгчээ.
Байгаль орчныг хамгаалагчдийн үзэж буйгаар, Хятад улс уур амьсгалын өөрчлөлтийг үүсгэгч хийнүүдийг хамгийн их ялгаруулагч нүүрснээс хамааралтай байдлаа бууруулахад илүү их хүчин чармайлт гаргах хэрэгтэй байна.
