ЗГХЭГ-ын дарга Ц.Нямдорж С.Зориг агсны амь насыг хөнөөсөн хэрэгт яллагдсан Т.Чимгээ, Б.Содномдаржаа нарыг хэлмэгдүүлсэн гэх асуудлаар байр суурь илэрхийллээ.
Тэрээр “Ямар ч улс төрийн сонгуульгүй үед энэ асуудлыг би олон ярьсан. Өмнө нь 2016 оны гуравдугаар сард би тагнуул, прокурорт “С.Зориг агсны хэргийг худлаа шалгаж байна аа, алдаа гарах магадлал өндөр байна, юмаа сайн хяна” гэсэн бичгийг явуулж байсан. Мөн 2016 онд яг энэ хэргийн анхан шатны шүүх хурал болж байх үед энэ асуудлыг хөндөж ярьсан. Ингээд нийт гурван удаагийн бүлгийн хурал дээр энэ асуудлыг ярьж байсан юм шүү.
Г.Эрдэнэбат прокурор 2012 оноос тус хэргийн ажлын хэсгийнх нь ахлагч байхдаа нийт дөрвөн төрлийн үүрэг гүйцэтгэсэн.
1. Гүйцэтгэх ажлыг шууд удирдаж байсан юм. Энэ хүрээнд эрүүдэн шүүх, гүйцэтгэх ажлын бүх ажиллагааг Г.Эрдэнэбат, Б.Хурц нарын гарын үсэгтэйгээр гүйцэтгэж байсан.
2. Мөрдөн байцаалтын ажилд бүгдэд нь хяналт тавьсан.
3. Улсын яллагчийн үүрэг гүйцэтгэсэн.
4. Ял эдлүүлэх үйл ажиллагаанд хяналт тавьдаг ажлыг мөн хийсэн. Гэхдээ яг нарийн яривал эдгээр нь Ц.Элбэгдорж гэх хүний даалгавраар хийсэн үйл ажиллагаа. Аюулгүйн зөвлөлөөр хоёр удаа энэ асуудлыг нууцаар хэлэлцэхэд Ц.Элбэгдорж хоёуланд нь гишүүн байсан шүү.
Хоёрдугаарт, энэ ажиллагаанд Монголын хуулийн зургаан байгууллагын удирдлага бүгд оролцсон. Тодруулбал, АТГ, ТЕГ, цагдаа, шүүх, прокурор бүгд оролцсон. Үүнд оролцоогүй хуулийн байгууллага гэж байхгүй. Та нар амьдралдаа намайг худал хэлж байхыг сонссон уу. Би худал ярьж үзээгүй юм байна. Миний ярьсан бүх зүйл протоколтой, үнэн. Энэ хэрэгт Т.Чимгээ, Б.Содномдаржаа хоёрыг хэлмэгдүүлсэн. Энэ хоёр суллагдах ёстой. Яагаад гэм зэмгүй хүмүүсийг та нар зургаан жил шоронд хорьж байгаа юм бэ гэсэн асуудлыг 2016 оноос хойш би ярьж байна.
2016 оны орон нутгийн сонгуулийн өмнө Бат-Үүлийг яллагдагчаар татсан. Түүнийг Ганхуяг, Булган, Б.Соднамдаржаа,Т.Чимгээ нартай бүлэглэн Зоригийн аминд халдсан нь нотлогдсон тул яллагдагчаар татна гээд татчихсан. Үүнийг прокурор нотлогдоогүй гээд хаачихсан. Ингэж хэрэг бүрдүүлээд нотолж чадаагүй. Булган, Ганхуягийг суллаад, Бат-Үүлийг хэрэгсэхгүй болгож, заримыг нь хаяад хөдөөний ядарсан хоёр хүнийг шоронд оруулаад дуусгасан даа гэв.
Дараа нь сэтгүүлчдийн асуултад хариулсан юм.
–Т.Чимгээ, Ч.Содномдаржаа хоёрыг та суллах ёстой гэж ярилаа. Хууль зүйн хувьд энэ хүмүүсийг суллах процесс нь яаж явагдах вэ, ямар боломж байгаа вэ?
-Эрүүгийн байцаан шийтгэх хуулийн 41-р зүйл гэж байдаг. Үүнд шинэ хэрэг илэрсэн нөхцөл байдлын улмаас эрүүгийн хэргийг шалгах, үүн дотор дөрвөн заалт байдаг. Дараах нөхцөл байдал илэрвэл хэргийг шинээр авч үзнэ гэх заалт бий. Үүний дагуу прокурор одоо ял халдаасан, хэргийг шинээр авч үзье, эрүүдэн шүүх хэрэг хүлээлгэсэн байна гэсэн эсэргүүцэл бичиж, дээд шүүх гурван шатны шүүхийн шийдвэрийг хүчингүй болгоно. Ингээд хуулийн хувьд Т.Чимгээ Ч.Содномдаржааа нарын хувь заяа шийдэгдэх ёстой.
–Хэрэв прокурор, шүүх таны тайлбарлаж байгаа талааас нь шийдвэрлэхгүй бол яах вэ?
-Өөр гарц байхгүй шүү дээ. Өөр гарц байхгүй учраас өчигдөр Дээд шүүх эрүүдэн шүүлтийг хүлээн зөвшөөрч буруутай хүмүүст нь ял эцэслэн баталлаа.
–Зочид буудалд Т.Чимгээ дээр гүйцэтгэх ажиллагаа явуулж гарын хээ, хурууны хээг авсан. Гэтэл яг хэргийн газар Т.Чимгээгийн гар, хурууны хээ үлдээгүй байсан гэсэн. Тэгээд яагаад сүүлд нь хурууны хээг нь тэгж авсан юм бол?
-Би мэдэхгүй. Тийм юм болсон байсныг тэр бичлэгээс үзсэн. Цогцостой харьцаж байгаа юм шиг харьцсан юм байгаа биз.
–Цорын ганц амьд гэрчтэй улс төрийн захиалга гэж тодорхойлогдсон энэ гэмт хэргийн захиалагчийг өдий олон жил яагаад илрүүлж чадахгүй байна вэ. Та үүнийг юу гэж харж байна?
-Үүнийг би зөндөө ярьсан. Тухайн өдөр буюу аравдугаар сарын 02 буюу тав дахь өдөр шиг санагдаж байна. Энэ өдөр Улсын мөрдөн байцаах газрын онц хүнд гэмт хэрэгтэй тэмцэх хэлтсийн бүх албан хаагчид амралтад гарчихсан байсан. Тэр хойгуур энэ хэрэг гарсан. Улмаар хэргийн газар үзлэг хийж чаддаггүй этгээд, үзлэг шахуу юм хийж түүнийг нь сүүлд нөхсөн. Хэргийн газар дээр гаднын хүн оруулж болдоггүй. Гэтэл яг хэргийн газар дээр Ц.Элбэгдорж тэргүүтэй 70-аад хүн ороод гарсан. Ийм зүйл дээр алдаа гарахаар дараагийн бүх боломжууд хаагддаг.
