Коронавирусний эсрэг вакцины хоёр тун хийлгээд хоёр долоо хоногоос дээш хугацаа өнгөрсөн бол вакцины бүрэн тунд хамрагдсан гэж үзэж буй.
Дархлаа хүн бүрд харилцан адилгүй хугацаанд тогтдог ч вакцины хоёр дахь тунд хамрагдаад хоёроос гурван долоо хоносон бол тухайн иргэнийг Ковид-19-ийн эсрэг дархлаатай болсон гэж үзэж байна.
Монгол Улсад вакцины бүрэн тундаа хамрагдсан 494,847 иргэн байгаа бол зорилтот насныхны 50.2 хувь нь буюу 1,037,675 иргэн вакцины эхний тунгаа хийлгээд байгаа талаар Эрүүл мэндийн яамнаас мэдээллээ.
ДАРХЛААЖУУЛАЛТ ҮР ДҮНГЭЭ ӨГЧ БАЙНА УУ?
Хоёр улсаар жишээ татъя. Израил улс хүн амд ногдох дархлаажуулалтын үзүүлэлтээр дэлхийд тэргүүлж байгаа бол цар тахал эхэлснээс хойш дэлхийд хамгийн их хохирол амссан АНУ-д амжилттай явагдаж байна.
Вакцинжуулалтаар тэргүүлж буй Израил улсад халдварын тохиолдол 100 дахин буурчээ
Олон улсад вакцины аян ид дундаа өрнөж байгаа энэ цаг үед 100 хүн тутамд хийсэн вакцины үзүүлэлтээр Израил улс тэргүүлсээр байна. 9 сая гаруй хүн амтай тус улсад 10.5 сая тун вакцин хийгээд байгаа ба хүн амын 62.4 хувь нь нэгдүгээр тундаа хамрагджээ.
Тус улсад 2021 оны нэгдүгээр сард оргил үедээ хоногт 10 мянган хүнээс коронавирус илэрч байсан бол энэ тоо 100 дахин буурч, тавдугаар сарын 3-ны өдөр л гэхэд 67 хүнээс коронавирус илэрчээ.
Нийт 838.5 мянган хүн халдвар авч, 6366 хүн нас барсан бол одоо хоногт зарим өдрүүдэд нас баралт бүртгэгддэггүй болжээ. Тавдугаар сарын 3-ны байдлаар Ковид-19-ийн шалтгаанаар нэг хүн нас барсан байна.
АНУ-д 246 сая тун вакцин хийжээ
330 сая хүн амтай АНУ-д нийт 246 сая, хоногт 2,4 сая тун вакцин хийгээд байна. Вакцины бүрэн тундаа хамрагдсан 95 сая хүн байна.
Тус улсад цар тахал эхэлснээс хойш нийт 33.1 сая хүнээс коронавирусийн халдвар авч өвчилжээ. 590 мянган хүнээ Ковид-19 өвчнөөр алдсан тус улсад оргил үедээ хоногт 4400 орчим хүн нас барж байв.
Өдгөө вакцинжуулалт эрчимтэй явуулснаас хойш буюу 2021 оны эхэн үеэс хойш хоногт илрэх халдварын тохиолдол тогтвортой буурчээ. Оргил үедээ хоногт 300 мянган хүнээс халдвар илэрч байсан бол одоо 10 дахин буурч 30 мянга болж, хоногт дунджаар 300 нас баралт бүртгэгдэж байна.
Халдварын тохиолдол, нас баралт буурч байгааг вакцинжуулалтын үр дүн гэж мэргэжилтнүүд үзэж байгаа юм. Вакцин халдвар авах эрсдэлийг бууруулахаас гадна Ковид-19 өвчний хүндрэлээс сэргийлэх ач холбогдолтойг өдгөө дэлхий нийтэд хэрэглэж буй вакцинуудын клиник туршилтаар баталсан.
ВАКЦИНЫ БҮРЭН ТУН ХИЙЛГЭСЭН БОЛ ДАРХЛАА ХЭДИЙ ХУГАЦААНД ТОГТОХ ВЭ?
Вакцины эхний тунг хийлгэснээр бүрэн дархлаа тогтдоггүй тул хоёр тунгаа заавал хийлгэх хэрэгтэйг ДЭМБ-аас сануулж байна.
Иргэдийн дунд вакцинаа хийлгэчихвэл насан туршийн дархлаа тогтоно, эсвэл жил бүр хийлгэдэг вакцин болно гэсэн ташаа ойлголт бий. Гэвч бүрэн тунд хамрагдсан бол хэдий хугацаанд дархлаа тогтохыг мэргэжилтнүүд хараахан тогтоогоогүй байна гэж ДЭМБ-ын албан ёсны сайтад мэдээлжээ.
Ямартай ч Ковид-19 өвчин хүний амь насыг эрсдэлд оруулдаг өвчин учраас вакцинд хамрагдсанаар таныг болон бусдыг хамгаалах боломжтойг сануулж байгаа юм.
ВАКЦИНЫ БҮРЭН ТУНГАА ХИЙЛГЭСЭН БОЛ БУСДАД ХАЛДВАР ТАРААХ ЭРСДЭЛТЭЙ ЮУ?
Вакцины бүрэн тунд хамрагдсан хүмүүсийг Ковид-19 өвчнөөс хамгаалж буйг клиник туршилтуудаар тогтоосон. Гэвч вакцин хийлгэсэн ч халдвар авсан цөөн тохиолдлууд гарсаар байна. Тухайлбал, дөрөвдүгээр сарын 15-ны өдөр гарсан мэдээллээр АНУ-д вакцины бүрэн тундаа хамрагдсан 5800 хүн халдвар авсан гэж мэдээлжээ.
Монгол Улсад дөрөвдүгээр сарын 28-ны байдлаар вакциндаа бүрэн хамрагдсан 80, эхний тунгаа хийлгэсэн 6000 гаруй хүн халдвар авсан гэж ХӨСҮТ-өөс мэдээлсэн. Вакцинаа бүрэн хийлгэсэн хүн амны хаалтаа авах болоогүй бөгөөд өөрөө халдвар авахгүй байж болох ч бусдад халдвар дамжуулагч болох эрсдэлтэйг анхааруулсан юм.
Харин вакцин хийлгэсэн хүмүүс халдвар тээгч болж бусдад халдвар тараах эрсдэлтэй эсэх нь мөн л тодорхойгүй байна гэж ДЭМБ-ын доктор Кэйт О.Брайан хэлжээ.
ВАКЦИНЫ БҮРЭН ТУНГАА ХИЙЛГЭСЭН ИРГЭДЭД ЯМАР БОЛОМЖ НЭЭГДЭХ ВЭ
Монгол Улсад
Вакцины хоёр дахь тундаа хамрагдаад 14 хоносон болон халдвар аваад эдгэрсэн иргэдийг хот хооронд зорчихыг хориглохгүй болсныг Засгийн газраас мэдээлсэн. Энэ шийдвэр тавдугаар сарын 5-наас мөрдөж эхэлнэ гэв.
Мөн коронавирусний вакцины бүрэн тунд хамрагдан гадаадаас ирж буй иргэдийг тусгаарлахгүй байхаар болсон талаар Гадаад харилцааны яамнаас мэдээлсэн.
Вакцин хийлгэсэн бол эмнэлэгт хэвтэхдээ PCR шинжилгээ өгөх шаардлагатай юу?
Вакцины хоёр дахь тундаа хамрагдсан иргэд шинжилгээ өгөхгүйгээр эмнэлэгт хэвтэх боломжтой эсэхийг тодруулахад эцэслэн шийдвэр гараагүй байгааг ХӨСҮТ-өөс мэдээллээ. Учир нь вакцин хийлгэсэн ч зарим хүн халдвар тээгч байж болохыг үгүйсгэхгүй тул зарим эмнэлгүүд PCR шинжилгээний бичиг нэхэж байгаа аж.
ХӨСҮТ-өөс хүсэлтээ ЭМЯ руу илгээсэн. ЭМЯ-наас эцсийн шийдвэр гарсны дараа эргэн мэдээлэл өгье гэлээ. Харин ЭМЯ-наас мэдээлснээр эмнэлгүүд иргэдээс түргэвчилсэн шинжилгээ авч байгааг хэлсэн юм.
ВАКЦИНЫ БҮРЭН ТУНД ХАМРАГДСАН ГЭРЧИЛГЭЭГЭЭ ДАРААХ САЙТААС АВНА
Дархлаажуулалтын бүрэн тунд хамрагдсан хүмүүс вакцины гэрчилгээгээ https://vis.health.gov.mn/ сайт болон https://e-mongolia.mn/ сайтад нэвтрэн орж авна.
Хэрэв таны мэдээлэл ямар нэгэн алдаатай шивэгдсэн болон вакцинд хамрагдсан мэдээлэл нь ороогүй тохиолдолд харьяа дүүргийн тандалтын албанд холбогдож мэдээллээ засуулах боломжтой хэмээн ЭМЯ-наас мэдээллээ.
Дүүргүүдийн тандалтын албаны лавлах утас:
- Баянгол дүүрэг- 70120318,
- Баянзүрх дүүрэг- 70150056,
- Хан-Уул дүүрэг- 70043085, 70049200,
- Сүхбаатар дүүрэг- 70116358,
- Сонгинохайрхан дүүрэг- 79976000,
- Чингэлтэй дүүрэг- 70106677
ДЭЛХИЙ ДАХИНД
АНУ вакцины бүрэн тундаа хамрагдсан иргэдээ маскгүй явахыг зөвшөөрлөө
АНУ-ын Өвчний хяналт, урьдчилан сэргийлэх төвөөс вакцины бүрэн тунгаа хийлгэсэн иргэдийг гадуур амны хаалтгүй явахыг зөвшөөрсөн талаар бид өмнө нь мэдээлсэн. Хэрвээ вакцины бүрэн тунгаа хийлгэсэн хүмүүс ганцаараа эсвэл вакцинд хамрагдсан цөөн тооны хүмүүстэй хамт явж байгаа тохиолдолд амны хаалтаа авах боломжтой юм.
Дархлаажуулалтад ганцаараа эсвэл гэр бүлийнхэнтэйгээ гүйж, дугуй унаж, гадуур зугаалахдаа амны хаалтгүй явах боломжтой бол хүн олноор цугласан байгууламж дотор эсвэл олон нийтийн газар амны хаалтаа зүүх ёстой.
Европын холбоо хилээ вакцинд хамрагдсан жуулчдад хилээ нээх эсэх талаар хэлэлцэж байна
Европын холбоо гадаад хилээ нээх эсэх асуудлыг хэлэлцэхээр болж байгаа бөгөөд тус холбооноос зөвшөөрөл олгосон вакцины бүрэн тунд хамрагдсан жуулчдыг нэвтрэхийг зөвшөөрөх тухай санал гаргаад байна.
Исланд улс вакциндаа бүрэн хамрагдсан жуулчдыг хүлээн авахаа зарлалаа.
АНУ-ын Лос Анжелес хотын төв цэнгэлдэх хүрээлэнд Холливүүдийн болон поп оддын оролцсон вакцинжуулалтыг дэмжих бүх нийтийн тоглолт болжээ. Цэнгэлдэх хүрээлэн рүү зөвхөн вакциндаа бүрэн хамрагдсан үзэгчдийг оруулсан байна.
АНУ-ын Өвчний хяналт, урьдчилан сэргийлэх газраас вакцины бүрэн тунд хамрагдсан иргэдэд зориулан гаргасан зөвлөмжөөс:
- Байгууламж доторх үйл ажиллагаанаас илүү задгай агаарт болох үйл ажиллагаанд оролцох
- Байгууламж дотор бол зөвхөн вакцин хийлгэсэн хүмүүстэй нэг дор цуглаж болох
- АНУ-д дотооддоо аялж байгаа бол заавал шинжилгээ өгч, тусгаарлагдах шаардлагагүй
- АНУ руу нисэхээс өмнө сөрөг хариу бүхий шинжилгээний бичгээ харуулах
- Хилийн чанадад аялаад ирсэн бол 3-5 хоногийн зайтай давтан шинжилгээ өгөх
- Халдвар авсан хүнтэй нэг дор байсан бол танд шинж тэмдэг илрээгүй л бол өөрийгөө тусгаарлах шаардлагагүй
Вакцины бүрэн тунд хамрагдсан ч та
- Халдвар хамгааллын дэглэмээ сахисаар байх /амны хаалтаа зүүх, гараа ариутгах/
- Гэр бүлийн гишүүнээс өөр вакцинд хамрагдаагүй хүмүүстэй нэг дор цуглахгүй байх
- Нэг дор олноор цуглахаас зайлсхийх
- Хэн нэг эрсдэлтэй бүлгийн хүнтэй уулзахгүй байх
БНХАУ-д үйлдвэрлэсэн вакцин тариулсан иргэдэд визний дэмжлэг үзүүлэх талаар өнгөрсөн гуравдугаар сард мэдээлсэн.
Тодруулбал, БНХАУ болон гадаад иргэдийн зорчих хөдөлгөөнийг үе шаттайгаар сэргээх зорилгоор, 2021 оны гуравдугаар сарын 15-ны өдрөөс эхлэн, БНХАУ-аас Монгол Улсад суугаа ЭСЯ нь Хятад Улсад бүтээсэн коронавируст халдварын эсрэг вакцин хийлгэсэн төдийгүй вакцин хийлгэсэн тодорхойлолт бүхий виз мэдүүлэгчдэд дэмжлэг үзүүлэх талаар мэдээлсэн.
