УИХ-ын чуулганы өнөөдрийн хуралдаанаар Хууль зүй дотоод хэргийн сайд Х.Нямбаатар өмгөөлөгч Б.Баасанцогтын орц, лифтний бичлэгийг хувийн харилцаатай эмэгтэй нь ил болгосон гэж мэдээллээ.
Гэмт хэрэг, зөрчлөөс урьдчилан сэргийлэх тухай хуульд нэмэлт, өөрчлөлт оруулах тухай хуулийн төслийн талаар хэлэлцэх үеэр УИХ-ын гишүүн Н.Алтанхуяг:
“Өчигдөр байнгын хороогоор энэ асуудлыг ярьсан. Энэ уржигдар өргөн барьсан хуулийн төсөл. Их хурал хуулиа барьж, гишүүд УИХ-аар орж ирж байгаа асуудлыг анхааралтай уншиж, хуулийн төслийг харах, судлах боломж олгооч. Хэтэрхий тулгуу байна, хууль зөрчиж байна.
Хоёрдугаарт, камерын асуудлыг дэмжиж байна. Эрүүл саруул ухаанд багтахуйц юм яримаар байна. Одоо байгаа 6000 гаруй камерын тал нь ажилладаггүй юм билээ. Нэг их наяд гээд том тоо яриад байна. Хамгийн их шаардлагатай цэгүүдэд тавина гэж тооцоолбол арай багасах юм биш үү? Хэрэгтэй хэрэггүй газарт тавихаар их зардал гарна. Нөгөө талаас камер яах вэ? Х.Нямбаатар сайдын үед бид их муухай булай юм үзэж байна. Хүний эрх, эрх чөлөөг зөрчиж байна. Орцонд байгаа камерын бичлэгийг олон нийтэд цацаж байгаа нь арай дэндсэн хэрэг. Цагдаа хүн зогсоогоод энгэртээ бичлэг хийдэг хэдэн он бэ? Хүний эрх, эрх чөлөөг хамгаалсан хуулийн төслийг эхлээд өргөн барих хэрэгтэй.
Хууль зүй, дотоод хэргийн сайд Х.Нямбаатар:
“Цахимын дөрвөн хууль их хурлаар удахгүй хэлэлцэнэ. Б.Баасанцогтын орцны болон лифтний үйл явдалтай холбоотой бичлэгийг надтай холбож ярих гээд байх шиг байна. Би шууд хариулъя. Өөрийнхөө нэрийг цэвэрлэх ёстой. Б.Баасанцогт гэдэг хүнтэй хувийн харилцаатай эмэгтэй орцны камерын бичлэгийг өөрөө гар утсан дээрээ бичиж авч олон нийтийн сүлжээнд цацсан юм билээ. Тэрэнд цагдаа ямар хамаа байх вэ дээ. Хувийн харилцаатай эмэгтэй нь орцны ажилтнуудаас хууль бусаар гар утсан дээрээ хуулж аваад цацсан юм билээ. Үүнийг харин хуулиар хориглож өгнө. Хаана камер байрлуулах, хаана ёсгүй вэ гэдгийг маш тодорхой болгоё. Үүнийг ил болгосон тохиолдолд эрүүгийн хууль тогтоомжоор ямар хариуцлага хүлээлгэдэг болгохыг тодорхой болгоё гээд байгаа. Н.Алтанхуяг гишүүнийг улс төржсөн өнцгөөр бүх юмыг хараад байгаад харамсаж байна. Хувь хүний нууцыг хуулиар чандлан хамгаалдаг болъё гэж байгаа юм” гэв.
