Чуулганы нэгдсэн хуралдаанаар “Монгол Улсын хууль тогтоомжийг 2024 он хүртэл боловсронгуй болгох үндсэн чиглэл батлах тухай” УИХ-ын тогтоолын төслийг хэлэлцлээ. Энэ үеэр хуулийн төслийг санаачлагч Хууль зүйн сайд Х.Нямбаатар биеэ өмөөрсөн харилцаа хандлага гаргасан нь УИХ-ын зарим гишүүдийн дургүйцлийг хүргэв.
УИХ-ын гишүүн Ш.Адъшаа: Хууль тогтоомжийн төслийг дэмжих боломжгүй байна. Х.Нямбаатар сайд УИХ-ын гишүүдийг даапаалсан, гоочилсон байдал, гаргаж юмаа мэдээрэй гэж загнахаа болих хэрэгтэй. Х.Нямбаатар, С.Бямбацогт хоёрын ярьж байгаа бодит амьдралд тэмээ, ямаа шиг зөрүүтэй байна. Зөрчлийн тухай хуулийг хэзээ өргөн барих вэ. Сайд та өвлийн хүйтэнд 30 мянган хүн цуглуулчихаад ярьж байсан зүйл чинь өнөөдөр хуучраагүй байгаа шүү. Х.Нямбаатар сайд та өнөөдөр Оюутолгойн тухай, Эрдэнэтийн 49 хувийн талаар юу ч ярихаа болсон. Яагаад чимээгүй болов. Тэмцэл чинь шударга ёсны төлөө байсан уу эсвэл Хууль зүйн сайд болохын төлөө байсан юм уу. Та намайг олонх болж байж олон юм яриарай гэсэн. Та бяртай байж болно. Бид ард түмнээс мандат авсан УИХ-ын гишүүд шүү.
ХЗДХЯ-ны сайд Х.Нямбаатар: Зөрчлийн тухай хуулийн шинэчилсэн найруулгын төсөл яамдаас санал аваад нэгтгэгдэж байна. Ш.Адъшаа гишүүн байнгын хорооны хурал болгон дээр над руу дайрах юм. Бидний жагсаалын үр дүнд хонгил гэдэг юм байхгүй болгохоор явж байна. Та хүртэл олон жил шалгагдсан шүү дээ. Гаалийн Адъшаа гэж Эрүүгийн цагдаагийн газраас байнга шалгадаг байсан шүү дээ. Ийм чиглэлийн юм ярих гэж байгаа бол хоёулаа тусдаа уулзаж ярилцаж болно.
С.Амарсайхан: Х.Нямбаатар сайдаа юм болгоныг өөр дээрээ тусгаж байгаа наад зан чинь буруу хандлага шүү
Хууль тогтоомж гэдэг бол бодлого. Батлаад хаядаг. Эдийн засгийн үр дагаварт нь үнэлэлт дүгнэлт өгөхгүй байгаад асуудал байна. Эрх зүйн зохицуулалтын хэмжээг нь хамт батлахгүй бол хууль өөрөө хууль биш болчихоод байна. Хэрэгжихгүй байна гээд өчнөөн хэл ам болсны дараа хуульд нэмэлт өөрчлөлт оруулдаг. Стандартчилал техникийн зохицуулалт хохирлын үнэлгээний итгэмжлэлийн тухай хууль, Худалдааны тухай хууль орж ирээгүй байна.
ХЗДХЯ-ны сайд Х.Нямбаатар: С.Амарсайхан гишүүнээ бид одоо хаана хулгай байгаагаа ойлгохгүй байна. Шүүмжлэхийн тулд шүүмжилж байгаа бол түүнийгээ та хэлээрэй. “Монгол Улсын хууль тогтоомжийг 2024 он хүртэл боловсронгуй болгох үндсэн чиглэл батлах тухай” УИХ-ын тогтоолын төсөл үндсэн дөрвөн чиглэлтэй. Дундуур нь хууль хулгайлах гээд байна гэх утгагүй юм ярихаа болимоор байна. Байнгын хороо, чуулганы хуралдааны үеэр өөрийг чинь нэг бус удаа үндэслэл нотолгоогүй юм ярихыг сонслоо. Стандартчилал техникийн зохицуулалт хохирлын үнэлгээний итгэмжлэлийн тухай хууль 2017 онд батлагдаж хүчин төгөлдөр үйлчилж байгаа.
УИХ-ын гишүүн С.Амарсайхан: Х.Нямбаатар гишүүнээ би өөр лүү чинь чиглээгүй. Яагаад орж ирсэн хуулийн төсөл болгоныг магтан дуулах ёстой юм вэ. Алдаа, цоорхойг нь засаж явъя гэсэн санаа хэлж байгаа юм. Юм болгоныг өөр дээрээ тусгаж байгаа наад зан чинь буруу хандлага шүү. Хэрвээ бид таны оруулж ирсэн бүхнийг чинь үг дуугуй дагаад, гараа өргөөд дэмжих ёстой бол энд суух ямар хэрэг байна.
Ж.Бат-Эрдэнэ: Х.Нямбаатар сайдаа таны биеэ өмөөрсөн байдлыг гишүүд их ярьж байна шүү
Хэд хэдэн хууль орж ирээгүй байна. Х.Нямбаатар сайд ганцаараа ярих биш яамдын төлөөллүүд энд байж байх ёстой. Гэр бүлийн хүчирхийллийн тухай хууль орж ирээгүй байна. Тариалангийн тухай, Бэлчээрийн тухай хууль орж ирээгүй байна. Хэдэн зуун жил эрхэлсэн мал аж ахуй тариалангийн талбай руу орж ирээд асуудал гардаг. Жижиг, дунд үйлдвэрлэлээ хөгжүүлье, ажлын байр бий болгоё гэж. Үүний цаана ядуурлаа бууруулах. Үйлдвэрлэлийн тухай хуулийг бүхэлд нь хүчингүй болгосон. Үйлдвэржилтийг дэмжих хуулиа сэргээж, зайлшгүй оруулж ирэх хэрэгтэй байна. Хот тосгоны эрх зүйн байдлын тухай хуулийг оруулж ирэх ёстой. Би яагаад мэргэжлийн сайд нарыг нэхээд байна гэхээр тухайн хуульд ямар өөрчлөлт оруулах эсэхийг мэргэжлийн үүднээс тэд хариулах ёстой. Х.Нямбаатар сайд та бишээ.
ХЗДХЯ-ны сайд Х.Нямбаатар: Гэр бүлийн хүчирхийллийн тухай хууль 2017 оноос хүчин төгөлдөр хэрэгжиж байгаа. Өнөөдөр гэр бүлийн хүчирхийллийн талаар илүү их мэдээлэлтэй болж байна. Жилд ойролцоогоор 8000 мянган гэр бүлийн хүчирхийлэл үйлдсэний улмаас баривчлах шийтгэл авч байна. Гэр бүл төлөвлөлт, гэр бүлийн орчинд эрүүл зөв хандлагыг бий болгох зэрэг олон цогц зүйлээр дамжуулан гэр бүлийн хүчирхийлэлтэй тэмцэнэ. Түүнээс биш таны хэлж байгаа шиг Гэр бүлийн хүчирхийлэлтэй тэмцэх хуульд ял шийтгэл нэмэх боломжгүй. Цаашид бид гэр бүлийн хүчирхийлэлтэй тэмцэх чиглэлээр илүү их ажлууд хийнэ.
УИХ-ын гишүүн Ж.Бат-Эрдэнэ: Х.Нямбаатар сайдаа таны биеэ өмөөрөх асуудлыг байдлыг гишүүд ярьж байна. Үнэхээр биеэ өмөөрсөн байдалтай харагдаж байна шүү. Би гэр бүлийн хүчирхийллийн тухай хуулийг ял гэдэг талаас яриагүй. Гэр бүл хүчирхийлэлтэй тэмцэх асуудлыг цогцоор нь хараачээ гэсэн таны хэлсэн зүйлийг нэг утга агуулгаар хоёр өнцгөөс ярилаа. Яагаад энэ өнцгөөс харж болохгүй юм бэ.
