Анагаахын шинжлэх ухааны доктор Д.Цэрэндагва оролцож, уламжлалт анагаах ухаанаар коронавируст халдварыг эмчлэх талаар мэдээлэл өглөө.
Тэрбээр “Уламжлалт анагаах ухааны ном сударт хүн төрөлхтөнд өвчин үүсгэж, аюулд хүргэж байгаа дөрвөн үндсэн шалтгааныг нэрлэсэн байдаг.
Үүнд,
Бүх төрлийн халдварт өвчин
Цар бусыг аюул буюу байгалийн гамшиг
Ад дон буюу сэтгэцийн эмгэг
Үг болон сэтгэлийн болон үйлийн хор багтаж байна.
Монгол Улсад коронавирусийн халдвар гаднаас зөөвөрлөгдөж бүртгэгдсэн цагаас Уламжлалт анагаах ухааны мэргэжлийн зөвлөл ЭМЯ-ны Уламжлалт анагаах ухааны хэлтэстэй хамтран COVID-19-ийн үед авах арга хэмжээний талаар ажиллаж эхэлсэн.
Улмаар Монголын уламжлалт анагаах ухааны аргаа коронавируст халдварыг эмчлэх түр зааврыг шинэчилж, коронавируст халдвараар хөнгөн, хүнд, хүндэвтэр өвчилсөн иргэдэд уламжлалт анагаах ухааны эмчилгээг хэрэглэх заалтыг оруулсан юм.
Уламжлалт анагаах ухааны эмч нар Цэргийн төв эмнэлгээс эхлээд Яармагийн 300 ортой эмнэлэгт ажилласан. Харин одоо АШУҮИС-ийн Монгол-Японы сургалтын эмнэлгийн Уламжлалт анагаах ухааны үндэсний төвийн 65 ортой эмнэлэгт коронавирусийн хөнгөн өвчтөнийг эмчилж байна.
Уламжлалт анагаах ухаанаар COVID-19 халдвар нь дөрвөн үе шатаар явагддаг.
Гуравдугаар үе шатандаа цусны халуун үүсэх буюу хүний биед муу цус үүсэж, цул эрхтэнүүд болох уушги, зүрх, элэг, дэлүү, бөөрийг гэмтээж байна.
Харин өвчлөөд эдгэрсний дараа дөрөвдүгээр үе шатандаа буюу хий цус харшлын үед шилжиж байна гэж бид тодорхойлсон. Энэ нь коронавирусийн халдвараар өвчлөөд эдгэрсэн ч тухайн өвчин цаашид архагшиж, гарах хор уршиг нь дөрөвдүгээр үе шатанд илэрнэ гэдгийг харуулж байгаа юм.
Энэ талаар ч дэлхий нийтийн судлаачид маш их бичиж байна.
Тухайлбал, Итали, Их Британи, АНУ, БНХАУ, Франц, Испани зэрэг улсад хийгдсэн судалгаагаар, уг өвчний шинж тэмдэг илэрсэн 7,000 гаруй хүнийг зургаан сарын турш дагаж судлахад олон эрхтэн тогтолцоонд байнгын болон хожуу хугацаанд хүндрэл, сөрөг үр дагавар гарчээ.
Өөрөөр хэлбэл, коронавирт халдвараар өвчлөөд эдгэрсэн хүмүүст дараа нь амьсгалын эртхэн тогтолцоо, зүрх судас, сэтгэц мэдрэл, дотоод шүүрэл, хоол боловсруулах эрхтэн болон арьсны тууралт, хүүхдийн олон эрхтэн хамарсан үрэвсэл илэрч байгааг тогтоосон байна.
Коронавируст халдвар аваад эдгэрсэн хүмүүст 12-6 сарын хугацаанд дараах шинж тэмдгүүд илэрчээ.
Үүнд, үс унах, толгой өвдөх, сэтгэл түгших, амьдралын чанар муудах, цусны бүлэн үүсэх шинж тэмдэг багтаж байна.
Иймд иргэд халдвар хамгааллын дэглэмээ барьж хамгийн түрүүнд өвдөхгүй байхад анхаарах ёстой.
Мөн уламжлалт анагаах ухааны эм танг эмчийн зааврын дагуу хэрэглэх, эдгэрсэн ч урхаг үлдээхгүйн тулд анхаарч, сайн амарч сувилуулах шаардлагатай” хэмээн ярив.
“Хөнгөн өвдөөд уламжлалтын эм хэрэглэсэн хүмүүсийн 92%-д нь зовуурь арилсан”
Түүнчлэн “Өнгөрсөн хугацаанд уламжлалт анагаах ухааны ямар эмчилгээ ямар үр дүн өгч байсныг бид тогтоосон.
COVID-19-ийн хөнгөн хэлбэрээр өвчлөөд уламжлалт анагаах ухааны эм уусан хүмүүсийн 92 хувьд нь зовуурь нь арилсан үр дүн гарсан.
Харин маш хүнд хэлбэрээр өвчилсөн өвчтөн амьсгалын аппаратад ордог тул уламжлалын эм уух боломж байхгүй. Зөвхөн шаардлагатай тохиолдолд л эм хэрэглэж болно” гэсэн юм.
