Өвөлжилтийн бэлтгэлийн хүрээнд БОАЖЯ, НЗДТГ, “Таван толгой түлш” ХХК-аас “Сайжруулсан түлшний цогц хэрэглээ” аяныг эхлүүллээ. Тус аян “Утаагүй, угааргүй, ухаалаг хэрэглэе” уриатайгаар өвөлжилтийн бэлтгэл хийх гурван сарын хугацаанд үргэлжлэх юм байна.
“Таван толгой түлш” ХХК-аас Улаанбаатар хотын сайжруулсан түлш хэрэглэгч 200 орчим мянган өрхөөс угаарын хийн хордлогод өртөж болзошгүй өндөр эрсдэлийн түвшинд үнэлэгдсэн 63620 айлын угаар мэдрэгчид дохиолол суурилуулжээ. Энэхүү дохиолол нь угаар ялгарсан тохиолдолд тус компанийн Хэрэглэгчдэд үйлчлэх төвд мэдээлэл дамжуулах аж. Тус төвөөс өрхийн иргэдэд гар утсаар мэдээлэл дамжуулж, шаардлагатай тохиолдолд инженер, засварын ажилчдыг явуулах юм байна.
Шахмал түлшний борлуулалтын үйл ажиллагаа хэзээнээс эхлэх талаар “Тавантолгой түлш” ХХК-ийн борлуулалтын хэлтсийн дарга Д.Миняагаас тодрууллаа.
Тэрбээр “Энэ жил 60 гаруй мянган тонн түлш нөөцлөх зорилт тавьсан. Өнөөдрийн байдлаар 50 мянган тонн түлш нөөцлөөд байна. Тухайлбал Чингэлтэй дүүрэгт 5200 орчим тонн, Сонгинохайрхан дүүрэгт 21 мянган тонн түлшний нөөц байгаа. Улаанбаатар хотын өдрийн хэрэглээ ойролцоогоор 3500 орчим тонн байдаг. Аравдугаар сарын 1 гэхэд Улаанбаатар хотын 20 хоногийн нөөцийг бэлтгэх зорилт тавин ажиллаж байна.
Засгийн газраас цар тахалтай холбогдуулан шахмал түлшний үнийг 50 хувь бууруулах шийдвэр гарсан. Энэ хөнгөлөлт 2022 оны дөрөвдүгээр сарын 1 хүртэл үргэлжилнэ. Мөн өнгөрсөн жил нэг айл өрхөд 7 хоногт зургаан уут түлш худалдах журам гарсан. Энэ журам ирэх өвөл үргэлжилнэ.
Гэхдээ нийтийн байр, халуун ус зэрэг томоохон талбайг галлаж халаадаг аж ахуйн нэгж, иргэдэд тусгай зохицуулалтаар нэмэлтээр түлш олгоно. Энэ жил тээвэрлэлтийн 22 компанийг 35 болгон нэмэгдүүлсэн” гэв. Улаанбаатар хотод энэ жил сайжруулсан шахмал түлшний борлуулалтын 600 цэг ажиллана. Түлшний борлуулалтын үйл ажиллагааг нээхээр бэлтгэж буй бөгөөд аравдугаар сарын 1-нээс хойш дийлэнх борлуулалтын цэгүүд ажиллаж эхэлнэ гэж албаныхан мэдээллээ.
Галлагааны улиралд:
- 2019-2020 онд 900 гаруй өрхийн 2970 хүн,
- 2020-2021 онд 350 гаруй өрхийн 786 хүн,
- 2021 оны эхний есөн сарын байдлаар 20 гаруй өрхийн 44 хүн угаарт хорджээ.
