Японы парламент эрх баригч Либерал ардчилсан намын даргын сунгаанд ялалт байгуулсан Кишида Фүмиог даваа гаригт тус улсын шинэ Ерөнхий сайдаар сонголоо. Улмаар Сүга Ёшихидэгийн Засгийн газар бүрэн бүрэлдэхүүнээрээ огцорсон юм.
Ингэснээр өдгөө 64 настай Кишида Фүмио Японы 100 дахь Ерөнхий сайд болж байна. Тэрээр 2012-2017 онд буюу Абэ Шинзогийн Засгийн газрын үед Японы Гадаад хэргийн сайдаар ажиллаж байв.
Тэрээр даваа гаригт Ерөнхий сайд болсон даруйдаа аравдугаар сарын 14-нд эрх баригч Либерал ардчилсан намын олонхоос бүрдэх парламентыг тарааж, аравдугаар сарын 31-нд болох парламентын сонгуулийн товыг наашлуулна гэж мэдэгдсэн юм.
Улс төрийн зарим ажиглагч Кишида Фүмиогийн энэхүү алхмыг “коронавирусийн халдварын тохиолдлын тоо улам бүр нэмэгдэж, намынх нь нэр хүнд доод цэгтээ хүртэл унахаас урьтаж сонгууль явуулахыг зорьж байна” гэж дүгнэсэн байна.
Кишида Фүмио нь “COVID-19”-ын халдварын тархалт нэмэгдэж, цар тахлын улмаас эдийн засаг нь уналтад орсноор зах зээлийн зогсонги байдал нь улам хүндэрч, Ази-Номхон далайн бүс нутагт Бээжинтэй хурцадмал байдалд хүрсэн Япон улсыг удирдахаар хүлээн авсан.
Ажиглагчид түүнийг зөвшилцөлд идэвхтэй тул Японы эдийн засагт тогтвортой байдлыг авчирж чадна гэж харж байгаа ч ирэх парламентын ээлжит сонгууль түүний хувьд хамгийн эхний улс төрийн сорилт байх юм. Гэтэл Японы залуу үе эрх баригчдаас дараагийн залгамж үедээ байр сууриа тавьж өгөхийг шаардах болсон.
Тиймээс 64 настай буюу харьцангуй хөгшин улстөрч болох Кишида Фүмиогийн хувьд олон нийт, тэр дундаа залуусын дэмжлэгийг авах нь мөн чухал байгаа юм. Тэгвэл Кишида Фүмиог Засгийн газартаа Сүга Ёшихидэгийн кабинетад ажиллаж байсан ердөө хоёр сайдыг үлдээж /Гадаад хэргийн сайд Мотеги Тошимицү болон Батлан хамгаалахын сайд Киши Нобүо/, цоо шинэ 13 хүнийг сайдаар томилсон. Гэвч түүний Засгийн газрын дундаж нас 61.8 байгаа нь 60.4 байсан Сүга Ёшихидэгийн өмнөх кабинетээс илүү хөгширсөн үзүүлэлт юм.
Кишида Фүмиогийн хувьд Японы ард түмний орлогын тэгш бус байдлыг арилгаж, цар тахлын дараах эдийн засгийг сэргээхэд олон арван их наяд иенийн багц хөтөлбөрийг хэрэгжүүлж, эрэлт, худалдан авалтыг нэмэгдүүлэх замаар эдийн засагт шинэ капитализмыг бий болгохоо амласан. Тэрээр Абэ Шинзогийн хэрэгжүүлж байсан Абэномикс эдийн засгийн бодлогыг нийгэмд тэгш хүртээмжтэй хүрч чадаагүй гэж шүүмжилсэн юм. Тиймээс Кишида Фүмио Японы өмнөх Засгийн газрын тэргүүн нар болох Абэ Шинзо болон Сүга Ёшихидэгийн барьж ирсэн эдийн засгийн бодлогыг үргэлжлүүлэхгүй байх магадлалтай юм.
Харин Японы шинэ Ерөнхий сайд гадаад бодлогын хувьд Сүга Ёшихидэгийн “Чөлөөлт, нээлттэй Энэтхэг-Номхон далай”-н бодлогыг үргэлжлүүлнэ гэж харж байгаа аж. Өөрөөр хэлбэл тэрээр АНУ, Энэтхэг болон Австрали зэрэг холбоотон орнуудтай харилцаагаа хадгалж, Куад эвслийн хүрээнд Ази-Номхон далайн бүс нутагт Бээжингийн түрэмгийллийг сөрнө гэсэн үг юм. Гэхдээ зарим Кишида Фүмио барууны холбоотнуудтай харилцаагаа хадгалах ч эдийн засгийн тогтвортой байдлыг хангахын тулд Бээжинтэй тэнцвэртэй харилцааг үүсгэхийг зорих болно гэх байр суурийг илэрхийлжээ.
Эх сурвалж: Reuters, CNN, The Straits Times
