Улсын Их Хурлын чуулганы нэгдсэн хуралдаанаар “Төрөөс мөнгөний бодлогын талаар 2022 онд баримтлах үндсэн чиглэл батлах тухай” УИХ-ын тогтоолын төслийг хэлэлцэж буй.
Улсын их хурлын гишүүн Ч.Ундрам
Монголбанк 2020 оны 10 сараас орон сууцны ипотекийн зээлийн хүүг 8-6 хувь болгож бууруулсан. Энэ нэг жилийн хугацаанд 9276 өрхөд 679.5 тэрбум төгрөгийн ипотекийн зээл олгосон байна. Энэ бол түүхэндээ нэг жилд гарсан зээлийн хамгийн өндөр үзүүлэлт юм. Энэ хугацаанд үл хөдлөх хөрөнгийн үнэ өссөн. Тухайлбал, 2021 оны есдүгээр сарын байдлаар орон сууцны үнэ метр квадрат тутамдаа 15.8 хувиар өсжээ. Гэтэл дэлхийн дундаж өсөлт зургаан хувь хүрэхгүй байна. Тэгэхээр байрны үнэ 15.8 хувиар өсөөд байхад ипотекийн зээлийн хүү буугаад ямар ч үр дүнгүй байна. Гэтэл монголбанкаас өгсөн мэдээллээр зээлийн хүүг буулгаснаар зээлдэгчийн сарын төлбөрийн хэмжээ 20 хувиар багасаж байна гэж тооцоолсон байна. Ямар тооцоо судалгаан дээр ийм дүгнэлтэд хүрснийг ойлгохгүй байна. Үүн дээр Монголбанкны бодлогын тохируулга хийгээгүй. Тэгээд ниргэсэн хойно нь хашхирав гэдэг шиг оны төгсгөлөөр ипотекийн зээл татна гэж байна.
Монголбанкны ерөнхийлөгч Б.Лхагвасүрэн
2013 оноос хойш Монгол улс ипотекийн хөтөлбөрийг хэрэгжүүлж байна. Ипотекийн зээлийн зорилго нь дундаж давхрагыг бий болгох зорилготой. Энэ жилийн хувьд 861 тэрбум төгрөгийн ипотекийн зээл олгосон байна. Ийнхүү 11400 иргэн орон сууцтай болжээ. Найман хувийн хөтөлбөрийн үед Монголбанк 90 хувийг нь олгож, 10 хувийг нь банк гаргадаг байсан бол зургаан хувийн хөтөлбөрт шилжсэнээр төвбанк 60 хувийг нь гаргаад, 40 хувийг нь банк гаргаж байна. Дийлэнх эх үүсвэр банкнаас гарч байна. Энэ жил 800 тэрбум төгрөгийн ипотекийн зээл гарах болсон шалтгаан нь Засгийн газрын эрүүл мэндээ хамгаалж, эдийн засгаа сэргээх 10 их наядын хөтөлбөрт ипотекийн хөтөлбөрийг оруулсантай холбоотой. Ирэх гурван жилд хоёр их наядын ипотекийн зээл гаргана. орон сууцны үнэ Өсөж байгаа нь түүхий эд, материалын үнэ өссөнтэй холбоотой. Монголбанкнаас хийсэн судалгаагаар он гарсаар орон сууцны үнэ 11 хувиар өссөн байна. Нийт борлуулагдаж буй орон сууцны 50 хувь нь хуучин, үлдсэн хувь нь шинэ орон сууц байдаг.
