Энэ сарын 17 өдрийн Засгийн газрын хуралдаанаар Нийслэлийн харьяа Өргөө, Амгалан, Хүрээ амаржих газруудыг Эрүүл мэндийн яамны харьяанд шилжүүлсэн. Ингэснээр амаржих газруудын үйл ажиллагааг бодлого чиглэлээр хангах ажил Эрүүл мэндийн яаманд шилжиж буй юм.
Эрүүл мэндийн сайд С.Энхболд, Эрүүл мэндийн яамны Эмнэлгийн тусламжийн газрын дарга Б.Буянтогтох, Хөрөнгө оруулалтын хэлтсийн дарга Т.Хонгорзул, Анхан болон лавлагаа шатлалын тусламжийн хэлтсийн дарга Ж.Нарангэрэл, Эх барих, эмэгтэйчүүдийн тусламж, үйлчилгээ хариуцсан мэргэжилтэн Н.Болормаа нар Өргөө амаржих газарт ажиллав. Тус амаржих газрын үйл ажиллагааны нөхцөл байдал, тусламж үйлчилгээнд тулгамдаж буй асуудлыг сонсох,цаашид авч хэрэгжүүлэх бодлогын чанартай ажлын талаар ярилцсан юм.
Энэ үеэр Эрүүл мэндийн сайд С.Энхболд “Цар тахлын онцгой үед эх нярайн тусламж үйлчилгээг хичээнгүйлэн гүйцэтгэж байгаа танай хамт олонд Засгийн газрын нэрийн өмнөөс болон хувиасаа баярласан талархсанаа илэрхийлье. Аливаа улсын эрүүл мэндийн салбарын гол шалгуур үзүүлэлт бол эх нярайн тусламж үйлчилгээ. Тиймээс нийслэлийн харьяанд байдаг гурван амаржих газрыг ЭМЯ харьяандаа авах санал оруулсан. Өнгөрсөн Засгийн газрын хуралдаанаар шийдвэр гарсан. Ингэснээр Засгийн газар, ЭМЯ-ны бодлого нэгж рүүгээ шууд хэрэгжих боломж бүрдлээ.
Төрөх эмнэлгүүдэд хөрөнгө оруулалт, тоног төхөөрөмж хоцрогдсон. Үүнд салбарын сайдын хувьд анхаарч, үе шаттай шийдвэрлэж шинэчилнэ. Нэн тэргүүнд 4d эхо аппарат, суурин рентген аппаратыг Өргөө амаржих газарт ирэх долоо хоногт өгнө. Мөн эмч нар ажлаа хийхэд дэмжлэг болгож 30 ширхэг компьютерыг хуваарилна. Салбараа цахимжуулах бодлогыг барьж ажиллаж байна. Эх барих, эмэгтэйчүүд, нярайн тусламж үйлчилгээг анхаарч ажиллах нь яамны тэргүүлэх бодлого байна гэв.
Эх барихын тусламж үйлчилгээ үзүүлж байгаа салбарууд нэг удирдлагатай болсноор бодлогоо хэрэгжүүлэх нь илүү дөхөм болох ёстой. Яамнаас гарч буй бодлого шууд хэрэгжих сайн талтай юм.
Өргөө амаржих газрын дарга Ж.Энхцэцэг 93 жилийн түүхтэй уг амаржих газрын үйл ажиллагааг танилцууллаа. Мөн 2021-2024 онд хэрэгжүүлэх ажлаа танилцуулав. Тус амаржих газар нийт 487 эмч ажилтантай, 7 тасаг нэгж, 12 алба, 10 хэсэгтэйгээр үйл ажиллагаа явуулж байна. 2016 оноос 2020 онд жилд дунджаар 11500 эх эсэн мэнд амарждаг байжээ.
Энэ оны эхний арван сарын байдлаар 8107 эх тус эмнэлэгт эсэн мэнд амаржсан байна. Жилд 34,000 хүн тус эмнэлгээр үйлчлүүлдэг гэнэ. Өдөрт 350 орчим хүн үйлчлүүлдэг. Одоогоор дөрвөн өөр хаалга дээр яаралтай тусламж үзүүлж буй. Энэ асуудлыг цэгцлэн нэгдсэн яаралтай тусламжийн хэсэгтэй болохоор тэргүүлэх чиглэлээ болгон эмнэлгийн удирдлага ажлаа эхлүүлсэн байна. Ингэснээр иргэдийг чирэгдүүлэхгүй, хаалга хооронд явуулахгүй, нэг дороос тусламж үйлчилгээг үзүүлэх боломж бүрдэх юм.
