Монгол Улсад зохион байгуулалттай гэмт хэрэг үлдсэн Хятадын иргэдэд оноосон ялыг хэвээр үлдээв

Сүхбаатар дүүргийн Эрүүгийн хэргийн анхан шатны шүүхээс 2021 оны есдүгээр сарын 2-ны өдөр Монгол Улсад зохион байгуулалттайгаар цахим гэмт хэрэг үйлдсэн БНХАУ-ын иргэн Шү Хуй Хуан, Еэ Чин Хуй, Хуан Яао Шэн нарт ял оноосон.

Тодруулбал, Шү Хуй Хуан, Еэ Чин Хуй, Хуан Яао Шэн нарын эдлэх ялыг таван жилийн хугацаагаар, Хуан Ши Бин, Лиан Жү Фөн, Нарсу нарын эдлэх ялыг дөрвөн жилийн хугацаагаар тус тус тогтоож, нээлттэй хорих байгууллагад эдлүүлэхээр шийдвэрлэсэн.

Уг шийтгэх тогтоолыг эс зөвшөөрч шүүгдэгч Шү Хуй Хуан, Еэ Чин Хуй нарын өмгөөлөгч Ц.Дэлгэрням, шүүгдэгч Нарсу болон түүний өмгөөлөгч Ц.Мэнджаргал, С.Батнасан нараас “…гэм буруугийн асуудлаар…” давж заалдах гомдол гаргажээ.

Гомдлын дагуу Нийслэлийн Эрүүгийн хэргийн давж заалдах шатны шүүх Шү Хуй Хуан, Еэ Чин Хуй, Хуан Яао Шэн, Хуан Ши Бин, Лиан Жү Фөн, Нарсу нарт холбогдох эрүүгийн хэргийг хянан хэлэлцээд Сүхбаатар дүүргийн Эрүүгийн хэргийн анхан шатны шүүхээс гаргасан шийтгэх тогтоолыг хэвээр үлдээж шийдвэрлэв.

Хэргийг эргэн сануулбал Тагнуулын ерөнхий газар, Цагдаагийн ерөнхий газраас хамтарсан тусгай ажиллагаа явуулж 2019 оны аравдугаар сарын 29-ний өдөр Монгол Улсад цахим болон мөнгө угаах гэмт хэрэг үйлдэх зорилгоор жуулчны визтэйгээр нэвтэрсэн БНХАУ-ын 800 орчим иргэнийг саатуулсэн.

Улмаар тэдний хэрэглэж байсан өндөр хүчин чадал бүхий 1000 орчим комьпютер, ухаалаг гар утас, 10 мянга гаруй үүрэн холбооны дата сим картууд, онц их хэмжээний бэлэн валют, тансаг зэрэглэлийн автомашиныг хураан авч байв.

Эх сурвалж: Нийслэлийн Эрүү, Иргэний хэргийн давж заалдах шатны шүүхийн тамгын газар