Шатахууны үнэ жаахан нэмэгдмэгц Монголын бүх зах, дэлгүүр, ТҮЦ бүр малчны хот хүртэл хөдөлгөөнд орж бүх юмны үнэ автоматаар дагаад өсчихдөг жамтай.
Хээр бэлчиж яваа үхрийн баас хүртэл газар унахын хооронд өртөг нь нэмэгдээд явчихдаг.
Худлаа гэвэл говийн аймагт нэг шуудай аргал 2000 төгрөгийн үнэтэй байснаа шатахууны үнэ 50 төгрөгөөр нэмэгдмэгц шууд 2500 төгрөг болсон гэж байгаа. Шатахууны үнэ уг нь 50 төгрөгөөр нэмэгдсэн шүү дээ.
Тиймээс үхрийн хатсан баас нэг шуудай нь 2050 төгрөг болж нэмэгдвэл зохистой юм шиг санагдаж байгаа юм. Гэвч аргал зарагч этгээд 450 төгрөгийг ямар ч үндэслэлгүйгээр санаанаасаа зохиож гаргаж ирээд нэмчихсэн хэрэг.
Монголчууд бол юмны үнийг ингэж зохиомлоор хөөргөдөж нэмдэг улс гэдэг нь энэ мэтээс харагдаж байгаа юм. Шатахууны үнэ нэмэгдчихсэн юм чинь гэж бодон тэнгэр харж байгаад л зохиомол үнэ гаргаж ирэн эд бараан дээрээ наачихаад авна уу байна уу хамаа алга гэсэн шиг ярвайгаад суучихсан наймаачид зах, дэлгүүрээр дүүрэн.
Энэ жилийн тухайд шатахууны үнийн өсөлтөөс гадна коронавирусын халдвар бүр сайхан далим болж байна.
“Хил хаалттай, ачаа тээврийн үнэ хэд дахин өссөн” гээд л өдөр болгон үнээ нэмцгээгээд… Гутал хувцас ч дүүрч өөрсдөө үйлдвэрлэдэг биш яалт ч үгүй гаднаас зөөж байгаа гэтэл нөгөө малчид маань “Сохор нохой дүйвээнээр” гэгчээр мах, сүү, цагаан идээнийхээ үнийг дагаж өсгөөд тэнгэрт хадаачихсан сууж байна. Мах, сүүг хилийн цаанаас зөөдөггүй биз дээ гэвэл “Шатахууны үнэ нэмэгдчихсэн юм чинь” гээд л гүйцээ.
Өнөөдөр манайд шатахууны үнэ дагаж өсдөг үнийн хөөрөгдлийг зохицуулах хууль үгүйлэгдэж байна. Төр засгийн оролцоо ч үгүйлэгдэж байна. Зах зээл үнээ өөрөө тогтоодог гэсэн алтан зарчим лав манай улсад шударгаар хэрэгжихгүй болох нь өнгөрсөн гучин жилийн турш ямагт үнээ нэмж, дур дураараа үнэ тогтоочихоод сууж байгаа наймаачдаас харагдаж байна биш үү.
Б.ЗУЛ
