Валютын зах дээр ам.долларын ханш чангарч, удахгүй нэг доллар 3000 төгрөгт хүрэх хүлээлт үүсчээ. Бодлого тодорхойлогчид /Монголбанк/ ам.доллар өсөх нөхцөл үүсээгүй, эрэлт нэмэгдээгүй гэж байгаа ч зах зээлд ханш өсөх хандлагатай болоод удаж байна. Сүүлийн нэг сарын хугацаанд ам.доллар төгрөгийн эсрэг 50 төгрөгөөр чангарав. Амралтын өдрүүдэд хар зах дээрх ханш 2900 давлаа. Нийгэмд долларын ханш өсч байгааг олон янзаар тайлбарлаж буй. Иргэд банкууд дээрх төгрөгийн хадгаламжаа ам.доллар руу хөрвүүлж байна, рублийн ханш унаж байгаатай холбоотойгоор оросууд их хэмжээгээр доллар авч байна гэх мэт. Энэ мэт хүлээлтээс үүдэлтэйгээр долларын эрэлт нэмэгдэж, ханш өдрөөр чангарч байна. Удахгүй барилга, бүтээн байгуулалтын улирал идэвхиж, жинхэнэ зах зээлээс долларын эрэлт нэмэгдэнэ. Энэ үед нэг ам.доллар 3000 давна гэж учир мэдэх хүмүүс анхааруулж байгаа юм.
Төгрөгийн ханшийг тогтвортой байлгах зорилготой ажилладаг Монголбанкнаас ам.долларын ханшийн өсөлт, эрсдэлийг хэрхэн харж байгааг тодруулахад дараах тайлбарыг өглөө.
-Рублиэр хийдэг гадаад гүйлгээ нь нийт гадаад гүйлгээний мөнгөн урсгалын 8-9% буюу харьцангуй бага хувийг эзэлдэг. Иймд рублийн ханшийн дотоодын зах зээлд үзүүлэх нөлөө харьцангуй бага юм. Мөн Монголбанкны хувьд рублиэр гадаад валютын нөөцөө бүрдүүлдэггүй.
Олон нийтийн сүлжээнд Монгол улсаас их хэмжээний валют аваад хилээр гарсан эсэх асуудлыг холбогдох хууль хяналтын байгууллагууд шалгах бөгөөд одоогоор ийм их хэмжээний валют гарсан тухай мэдээлэл Монголбанкинд ирээгүй байна.
Олон улсад үүсээд буй тодорхой бус байдлаас шалтгаалан иргэдийн дунд төгрөгийн ам.доллартай харьцах ханш сулрах нь гэсэн болгоомжлол үүсч байна. Үүсээд буй нөхцөл байдлыг Монголбанк түр зуурын шинжтэй гэж харж байгаа бөгөөд төгрөгийн ханш огцом сулрахаас сэргийлэх зорилгоор Монголбанкнаас долоо хоногт хоёр удаа гадаад валютын дуудлага худалдаа, валют арилжааны цахим талбараар банкуудад гадаад валют тогтмол нийлүүлэн ажиллаж байна. Төв банкны гадаад валютын интервенцийн хэмжээ өмнөх жилүүдээс илүү эрчимжсэн бөгөөд энэ нь тухайн үеийн эдийн засгийн нөхцөл байдал, гадаад төлбөр тооцоонд хангалттай хүрэлцэхээр байна.
Хэдийгээр Монголбанкнаас нийлүүлж буй гадаад валютын хэмжээ нэмэгдэж байгаа ч Монгол Улсын гадаад валютын албан нөөц 2022 оны нэгдүгээр сарын эцсийн байдлаар 3945 сая ам.доллар буюу 7.0 сарын импортын барааны хэрэгцээг хангах түвшинд буюу ОУ жишиг түвшнээс өндөр байна гэсэн юм.
