Шатахуун, мах, гурилын үнэ тогтворжуулах, нийлүүлэлтийг таслахгүй байхад анхаарах талаар Сангийн сайд Б.Жавхлан мэдээлэл өгөв.

Үүнтэй холбоотойгоор Засгийн газар өнөөдөр 15:30 цагт ээлжит бус хуралдаан зарлалаа.  Тодруулбал, олон улсын хямралт нөхцөл байдлаас үүдэлтэй гол нэр төрлийн бараа бүтээгдэхүүний үнийн өсөлт, хомсдолоос сэргийлэх, нөлөөллийг бууруулах тухай хуулийн төсөл болон дагалдах бусад хууль тогтоомжийн төслийг хэлэлцэнэ.

Сангийн сайд Б. Жавхлан хэлэхдээ  “Бидний өдөр тутмын амьдралд өргөн хэрэглээний бараа шууд нөлөөлдөг. Эдгээр бүтээгдэхүүний үнийг тогтвортой байлгах үүднээс эрх зүйн орчинд яаралтай өөрчлөлт оруулах, төрийн гол институт болон Монголбанк үүнд ямар үүрэгтэй вэ гэдгийг богино хугацаанд тодорхойлох нь чухал байна.

Одоо үүсэж буй асуудалд бид зөв анализ хийх хэрэгтэй. Жишээ нь, шатахууны үнэ, нийлүүлэлт биднээс шалтгаалах нь маш бага.  Нэгдүгээрт,  нийлүүлэлтийн шоконд орж болохгүй. Тиймээс өнөөдрийг хүртэл шатахуун импортлогчдын хийсэн гэрээт худалдан авалтуудыг цаг хугацаанд нь хийх хэрэгтэй. Дараагийн хүндрэл нь үнийн асуудал юм.

Урд нь арван төгрөгөөр 10 литр шатахуун татдаг байсан бол одоо арван төгрөгөөр 6-7 литр татдаг болж байгаа юм.Улмаар импортлогчдын татан авах хөрөнгө мөнгөний хүчин чадалд хомстол үүсэх эрсдэл бий. Үүнд, Засгийн газар хэрхэн яаж хамтарч ажиллах боломжтой гэдгийг харах хэрэгтэй” хэмээн хэлэв.

Долдугаар сар хүртэл нөөцийн махны нийлүүлэлтийг тогтвортой байлгах хэрэгтэй. Иймээс үнийг барих шийдэлтэй байна

Тэрбээр махны эрэлт, нийлүүлэлтийн талаар “Манай улс махыг дотоодоосоо хангаж чадахуйц боломжтой. Гэхдээ нийт хүн амын дийлэнх нь нийслэлд төвлөрч амьдардаг. Гол хүндрэл энд гарч байна. Улаанбаатар хотын хэрэглэгчдийн дунд махны үнийг тогтвортой барих, долдугаар сар хүртэл нөөцийн махны нийлүүлэлтийг тогтвортой байлгах хэрэгтэй. Иймээс одоо байгаа үнийг барих шийдэлтэй байна” хэмээв.

Шатахуун, мах, гурилын үнэ, нийлүүлэлтэд онцгой анхаарна

Гурилын үнэ, нийлүүлэлтийн тухай  “Энэ төрлийн бүтээгдэхүүний үнийг тогтвортой байлгах чиглэлээр Засгийн газраас анхаарна. Үүнд, бэлтгэн нийлүүлэгчдийн оролцоо ч чухал нөлөөтэй. Хамгийн гол нь бид төрөөс боломж өгнө. Дээрээс нь хувийн хэвшлийнхэн болон тал талын оролцоо маш сайн байх ёстой.Ингэснээр богино хугацааны үүссэн нөхцөл байдлыг бага хохиролтой давна.

Дээр дурдсан гол гурван бараанд төвлөрнө. Өөрөөр хэлбэл, шатахуун, мах, гурилын үнэ, нийлүүлэлтэд онцгой анхаарна гэсэн үг. Ямар ч байсан шатахуунтай байхад бизнес зогсохгүй.  Монгол хүн мах, гурилтай байхад ямар ч байсан болно. Харин бусад нэр төрлийн барааг бүгдийг нь дийлэхгүй” гэсэн мэдээллийг өгсөн юм.