Н.Баатарбилэг: ЭЕШ өгөхгүйгээр МУИС-ийн ойн ангид 1.5-2 жил суралцаж төгсөх боломжтой

Монгол Улсад ойн мэргэжилтэн дутагдалтай байгаатай холбоотойгоор МУИС-ийн ой судлалын судлаач, эрдэмтэд мэдээлэл хийв. Энэ үеэр ойн мэргэжилтэн бэлтгэх хөтөлбөрийг танилцууллаа. Тодруулбал, ЭЕШ өгөхгүйгээр МУИС-ийн ойн ангид 1.5-2 жил суралцаж төгсөх боломжтой гэдгийг хэлсэн юм.

МУИС-ийн профессор, Ой судлалын ухааны доктор Н.Баатарбилэг дараах мэдээллийг өгсөн юм.

Одоогийн байдлаар манай улсад ойн чиглэлээр 600 гаруй мэргэжилтэн ажиллаж байна. Тодруулбал, энэхүү мэргэжлээр улсын хэмжээнд жилд 20 гаруй инженер бэлтгэгдэж буй. Энэ бол хангалттай тоо биш.

МУИС-д ойн мэргэжлээр 50 гаруй оюутан сурч байгаа. Үүнийг ахисан түвшний оюутнуудыг нэгтгэж тооцвол 100 гаруй суралцагч бий.

Сүүлийн 20 гаруй жил байгаль шинжлэлийн чиглэлээр элсэн суралцах мэргэжилтний эрэлт буурсан. Гэхдээ Тэрбум мод үндэсний хөдөлгөөний хүрээнд ойн салбарыг сонирхох хандлага залуусын дунд бий болж байна.

Тэрбум мод үндэсний хөдөлгөөнийг хэрэгжүүлэхэд 7,000 гаруй мэргэжлийн ажилчин,1,200 инженер хэрэгтэй. Тийм учраас үүнийг сургалтын хөтөлбөртэй уялдуулах шаардлагатай байгаа юм.

“Тарьж буй модлог ургамалд мал, амьтан сөрөг нөлөө үзүүлэх нь бий”

МУИС-ийн Хүрээлэн буй орчин, ойн инженерчлэлийн тэнхимийн багш С.Гэрэлбаатар мод тарьж, бургуулах талаар мэдээлэл өгсөн юм.

Мод тарьж, ургуулахаас өмнө хөрсөө судлах хэрэгтэй. Хэрэв хөрс үржил шим муутай байвал бордох, эсвэл үржил шимтэй хөрсийг ухаж бэлтгэх аргаар тарьж ургуулах боломжтой.

Услахдаа тухайн мод хэр их ус шаарддаг вэ гэх биологийн онцлогийг мэддэг байх хэрэгтэй. Тохиромжтой хэмжээний услалтаас гадна, ямар үржил шимийн бодис дутагдаж буйг хөрсний химийн шинжилгээгээр тодорхойлох нь чухал.

Тарьж буй модлог ургамалд мал амьтан сөрөг нөлөө үзүүлэх нь бий. Ялангуяа, дээш өсөж байгаа модны оройг идвэл өсөхөө больдог.