Авлигатай тэмцэх газрын саналыг үндэслэн Улсын ерөнхий прокурор УИХ-ын гишүүн Н.Алтанхуяг, Г.Амартүвшин, Ё.Баатарбилэг, Х.Ганхуяг нарын бүрэн эрхийг түдгэлзүүлэх саналаа УИХ-д хүргүүлсэн. Үүний дагуу УИХ-ын Халдашгүй байдлын дэд хороо хуралдаж тэдний бүрэн эрхийг түдгэлзүүлэх эсэх асуудлыг хэлэлцэж байна. Улсын ерөнхий прокурор Б.Жаргалсайхан дэд хорооны хаалттай хуралдаанд оролцож саналаа танилцуулж, тус хорооны гишүүдийн асуултад хариулж байгаа юм. Хуралдааны дундуур УИХ-ын гишүүн Н.Алтанхуяг сэтгүүлчдэд мэдээлэл өглөө.
Тэрээр “Намайг яллагдагчаар татах тогтоол өнгөрсөн баасан гаригт гарсан юм билээ. Нэг дэх өдөр намайг 16.00 цагт ирж танилцаарай гэсэн. 10 гаруй хуудастай юм билээ. Дэд хорооны хурлын үеэр намайг ямар асуудалд буруутгаж яллагдагчаар татаж байгаа тухай асууж хариулт авлаа. Есөн жилийн өмнө Тавантолгой чиглэлийн хар замд Ухаа худагийн нүүрс зөөдөг машинууд явдаг байсан. Харин орон нутгийн Тавантолгой, “Эрдэнэс-Тавантолгой” компанийн машинууд шороон замаар явдаг байлаа. Нүүрсний үнэ 2013 онд 30 ам.доллар болтлоо уначихсан, зардлаа багасгах шаардлага гарсан. Тэр үед “Эрдэнэс-Тавантолгой”, орон нутгийн Тавантолгой компани нийлээд “Энержи ресурс” компанийн замыг “Эрдэнэс Монгол” төрийн өмчийн компанид худалдаж авч өгөх саналыг Эдийн засгийн хөгжлийн яамнаас оруулж ирсэн. Ингэснээр тэр замаар бүх машин явж, машинуудаас авсан хураамжаар их мөнгө цуглана. Цугласан мөнгөнөөс өрөө төлчихье гэж шийдээд Засгийн газар тогтоол гаргасан. Замыг нь “Эрдэнэс Монгол”-д өгөөд, дараа нь мөнгөө төлөөрэй гэсэн агуулгатай тогтоол гаргасан хэргээр яллагдагч болгож байна. Бас энэ тогтоолыг батлахдаа Засгийн газрын хуралдааны дэг зөрчсөн гэж байгаа юм байна. Ерөнхий сайд материалыг нь бүрдүүлдэггүй. ЗГХЭГ-ын дарга бүрдүүлдэг. Ийм асуудлаар буруутгагдаж байгаагаа мэдээж тэр шийдвэртэй холбоотой материалуудыг олж танилцлаа. Тэр замыг 174 тэрбум төгрөгөөр авч байсан юм байна. Замын хураамжаас өнөөдөр нийтдээ 320 тэбум төгрөг цугласан юм байна. Улсад ашигтай үйлдэл болсон гэсэн үг. “Эрдэнэс Монгол” компани тэр зам худалдаж авсан 174 тэрбум төгрөгөө Хөгжлийн банкнаас авчихаад зээлээ төлөөгүй байгаа юм байна. Тэр нь надад ямар хамаатай юм бэ. Би ямар энэ замыг төдөөр ав, Хөгжлийн банкнаас зээл ав гэсэн биш. Зохион байгуулалттай л юм явж байгаа юм байна. “Гуя дагаж хүзүү” гэдэг шиг юм хийж байна. Нэг намын олон хүн орж ирэх гээд байхаар нь ингэсэн юм байлгүй дээ. Дээр нь Н.Алтанхуягийг чимээгүй болгоё гэсэн бололтой. Халдашгүй байдлын дэд хорооны хуралдаанд УИХ-ын гишүүд, Ерөнхий сайд, сайд хийж байсан хүн байна. Тэд засаг дээр шийдвэр яаж гардгийг мэднэ. Тиймээс асуудалд бодитой хандах байлгүй дээ” гэв.
