Оюу Толгойн ажилчид цалингаа нэмүүлэхийг шаардаж жагсаал хийлээ.
Тэд бараа бүтээгдэхүүний үнийн өсөлттэй холбоотойгоор цалингаа 30 хувиар нэмүүлэх хүсэлт тавьсан ч 3 хувиар нэмсэн гэв. Тиймээс үүнийг эсэргүүцэж өнөөдөр Оюу толгойн офис байрлах Моннис Тауэрийн өмнө жагслаа.
Жагсагчдын нэг: “Бид цалинг 30 хувиар нэмэгдүүлж өгөөч гэж Үйлдвэрчний эвлэлийн хороогоор дамжуулан саналаа өгсөн. Гэвч үйлдвэрчний эвлэл ажилчдынхаа эрх ашгийг хамгаалж чадсангүй. 3 хувиар нэмэх шийдвэр гаргаж байгаад харамсаж байна. Удирдлагууд энэ асуудлыг дахин харах хэрэгтэй. Бид ажил хаямааргүй байна. Бараа бүтээгдэхүүний үнийн өсөлтийг цалингийн нэмэгдэл гүйцэхгүй байна. Бид цаашдаа бараа бүтээгдүүний үнэ яаж нэмэгдэхийг мэдэхгүй.
Жилийн өмнө 1430 төгрөгийн үнэтэй байсан АИ92 бензин өнөөдөр 2390 төгрөг болж, 90-ээс дээш хувиар өсөж байгаа учраас хамгийн багадаа цалингийн нэмэгдлийг 30 хувиар нэмж өгөхийг шийдэж өгөөсэй гэж хүсэж байна. Өнөөдрийн байдлаар 100-гаад хүн гарын үсгээ зурсан” гээд шаардлагаа хүргүүлэхээр офис руу орсон байна.
