Индонезын Бали аралд сүүлийн хоёр өдрийн хугацаанд болж өнгөрсөн Их 20-ын бүлгийн гадаад хэргийн сайд нарын уулзалтыг ОХУ-ын гадаад хэргийн сайд Сергей Лавров эрт орхин явжээ.
Украины дайнтай холбоотой Өрнөдийн орнуудын төлөөлөгчдийн үзүүлсэн эсэргүүцэл түүнийг ийм алхам хийхэд хүргэсэн байна.
Пүрэв гарагийн орой төлөөлөгчид хүндэтгэлийн зоог барих ёстой байсан ч Их Долоон гүрний гадаад хэргийн сайд нар Лавровтой нэг ширээнд суухаас татгалзаж, арга хэмжээнд оролцоогүй ажээ.
Баасан гарагт уламжлал ёсоор уулзалтын төлөөлөгчид цугтаа гэрэл зураг авхуулах ёстой байсан ч мөн Өрнөдийн гадаад хэргийн сайд нар Лавровтой зэрэгцэж зогсохоос татгалзсан байна.
Уур амьсгал ийм байсан тул Сергей Лавров цөөн хэдэн улсын төлөөлөгчидтэй уулзсаныхаа дараа Баасан гарагийн өглөө нутаг буцжээ. Тэрбээр үдээс хойших хуралдаан, оройн хаалтын хүндэтгэлийн арга хэмжээ зэрэгт оролцолгүй буцсан байна.
Буцахаасаа өмнө Лавров өөрийн улсын Россия 24 сувгаар ярихдаа “Надтай уулзахаас зайлсхийж, тэд хамт зургаа авхуулахаас татгалзлаа. Би хэнийг ч хамт зургаа авхуулъя гэж гуйгаагүй. Өчигдөр бас Индонезын талын зохион байгуулсан хүлээн авалтад тэд оролцсонгүй” гэжээ. Тэрбээр Өрнөдийнхний “Оросыг ганцаардуулах ажиллагаа” хэрээс хэтэрч байгааг энэ үеэр хэлсэн байна.
Их 20-ын уулзалтын үеэр Лавровтой уулзах төлөвлөгөө байхгүйг АНУ-ын төрийн нарийн бичгийн дарга Энтони Блинкен, Германы гадаад хэргийн сайд Анналена Бэрбок нар өмнө нь мэдэгдэж байсан юм.
Арга хэмжээний үеэр Оросын төлөөлөгчийг үг хэлэхэд Америк, Канад, Европын төлөөлөгчид хурлыг орхин гарч байв.
Германы гадаад хэргийн сайд үг хэлэхдээ Оросын эрх баригчдад Украинд явуулж буй эзлэн түрэмгийллээ зогсоохыг уриалахад Лавров мөн танхимыг орхин гарч байжээ.
ОХУ-ын гадаад бодлогын тэргүүн энэ удаагийн арга хэмжээнд оролцохдоо Хятад, Турк улсуудын гадаад хэргийн сайд нартай зөвхөн уулзсан байна.
Эх сурвалж: politico.eu
