Омикроны BA.4, BA.5 хувилбарын шинж тэмдгийн талаар Эрүүл мэндийн сайдын зөвлөх О.Батбаяр дараах мэдээллийг өгөв.
Тэрбээр “BA.4, BA.5 хувилбарын шинж тэмдэг ихэнхдээ адил. Гэхдээ BA.5 хувилбар нь халдварлах чадвар илүү өндөр учраас энэ хувилбарын эзлэх хувь эрчимтэй нэмэгдэнэ гэдэг таамаглалыг эрдэмтэд гаргасан.
BA.4, BA.5 хувилбарын хувьд толгой өвдөх шинж тэмдгээр эхэлж, нус гоожих, хоолой өвдөх, хоолой хорсох, юм залгиж чадахгүй болох, бөгшүүлж ханиалгах шинж илэрч байгаа. Улмаас тасралтгүй ханиаснаас болж уушгины жижиг судаснууд тасарч, цустай цэр гарах шинж тэмдэг голлож байна.
Хүүхэд энэ хувилбараар өвчилсөн тохиолдолд эхний гурав хоног халуурч, ханиалгаж, гурав дахь хоногоос гайгүй болж байгаа. Мөн хэвлийгээр өвдөх, бөөлжих, гүйлгэх, шинж тэмдэг илэрч байна.
Эцэг эхчүүд хүүхдээ ханиалгахад сандарч, эмнэлэгт хэвтэх хүсэлт ихээр тавьж байгаа. Эрүүл мэндийн байгууллагын зүгээс халдвар авсан хүүхэд, насанд хүрэгчдийг гэртээ эмчилгээ хийж, эм уух, халуун хоол цай хэрэглэж дархлаагаа дэмжихийг зөвлөж байгаа.
Ер нь BA.4, BA.5 хувилбарын шинж тэмдэг харьцангуй хөнгөн байх болов уу гэдэг таамаглалын дэлхийн олон орны эрдэмтэд гаргаж байсан. Харамсалтай нь тийм биш байна. Вирус хувьслынхаа явцад халдварлах чадвар нь нэмэгдэж, шинэ тэмдэг нь хөнгөн болдог. Гэвч одоогоор SARS-CoV-2 вирус дээр энэ шинж тэмдэг илрэхгүй байгаа нь эрдэмтдийн санааг зовоож байна.
Мөн бидний сайн мэддэг амт, үнэр алддаг шинж тэмдэг энэ хувилбар дээр илрэхгүй байгаа.
Иргэдийн зүгээс BA.4, BA.5 хувилбар хэр том давлагаа үүсгэх вэ гэдэг асуулт ирүүлж байгаа. Энэ хувилбар тухайн улсад хэр том давлагаа үүсгэх вэ гэдэг нь тухайн улсын вакцины хамрагдалтаас шалтгаалдаг. Тиймээс дараагийн тунгийн дархлаажуулалтдаа хамрагдахыг нийт иргэдэд уриалж байна” гэлээ.
