Хан-Уул дүүргийн Засаг даргын Тамгын газрын захиалгаар Яармагийн авто замд явган хүний нүхэн гарц барих ажил өнөөдрөөс эхэлжээ.
Энэ ажлын хүрээнд авто замыг сэтэлж, бүтээн байгуулалтын ажлыг үргэлжлүүлэх шаардлагатай болсон тул “Хүннү молл”-ын баруун урд талын уулзвараас “Шинэ өргөө” хороолол хүртэлх 200 метр замын хөдөлгөөний зохион байгуулалтад түр хугацаанд өөрчлөлт оруулах гэж байна. Тодруулбал:
- Наймдугаар сарын 1-11-ний хооронд зүүнээс баруун чиглэлийн,
- Наймдугаар сарын 11-22-ны хооронд баруунаас зүүн тийш чиглэсэн хөдөлгөөний зохион байгуулалтад тус тус өөрчлөлт оруулах юм байна.
Иймд иргэд жолооч нарыг дээрх хугацаанд замын тэмдэг тэмдэглэгээний дагуу хөдөлгөөнд оролцохыг анхааруулав. Энэхүү 37.5 метр урттай нүхэн гарц ашиглалтад орсноор автомашин, явган хүний хөдөлгөөний огтлолцол үгүй болж, явган зорчигчид зам тээврийн осолд өртөх эрсдэл буурна гэж үзэж байна.
Тус замыг хэсэгчлэн хааснаар хотын төвөөс баруун чиглэлд зорчих автозамын хөдөлгөөн удааширч, иргэд бухимдсан сэтгэгдлээ цахим орчинд илэрхийлсэн байна.
