Улаанбаатар хотын түгжрэлийг бууруулах төсөл арга хэмжээний хүрээнд 13 байршилд шинээр авто зам тавихаар болсон. Төлөвлөгөөт ажлын нэг болох Гачууртаас Шар хадны автобусны эцсийн зогсоол хүртэлх 4.27 км засмал зам тавих ажлыг өнгөрсөн тавдугаар сарын 10-наас эхлүүлсэн. Тус ажлын хүрээнд Гачууртын авто замаас хойшоо 800 метр газарт газар шорооны ажил болон хашлага суурилуулах ажил гүйцэтгэж, зорчих хэсэгт асфальт бетон хучилт хийхэд бэлэн болоод байна. Үүнтэй холбогдуулан энэ баасан гараг буюу наймдугаар сарын 5-ны 23:00 цагаас 14-ний 23:00 цаг хүртэл Улиастайн хуучин эцсээс Гачуурт хүртэлх авто замын хөдөлгөөнийг хязгаарлахаар болжээ.
Тус замыг шинээр тавьснаар Шар хадны эцсийн буудлаас Гачуурт чиглэлд авто замын шинэ сүлжээ бий болохоос гадна Гачууртын зам, Шар хадны гудамжны авто замын хөдөлгөөний ачааллыг хуваарилж, түгжрэлийг бууруулах ач холбогдолтой юм.
