АН-ын дарга С.Эрдэнэ Төрийн ордонд хэвлэлийн хурал хийв. Тэрээр АН-ын дотоод үйл хэрэгт хөндлөнгөөс бүдүүлгээр оролцох нь хэвээр байгаа тул УИХ дахь АН-ын бүлгийг татан буулгасан гэв.
Энэ шийдвэрээ УИХ-ын дарга Г.Занданшатарт хүргэжээ. Цаашид АН-ын бүлэг үйл ажиллагаа явуулахгүй. Гэхдээ зөвлөл байгуулан ажиллана. Зөвлөлийг УИХ-ын гишүүн Д.Ганбат тэргүүлнэ. Цаашид УИХ дахь АН-ын гишүүд АН-ыг төлөөлөхгүй гэв. Мөн АН Засгийн газрын шинэ бүрэлдэхүүнд АН-ын ямар ч сайд ажиллахгүй, энэ нь үндэслэлгүй мэдээлэл. Манай намын 4-5 хүнд сайдын суудал амлажээ. Энэ амлалт биелэхгүй гэсэн юм.
АН-ын Ерөнхий нарийн бичгийн дарга Ч.Өнөрбаяр: Бид цаашид тоглоомын бүлэгтэй байснаас байхгүй байсан нь дээр гэж үзлээ. Өмнө нь АН зөвлөлтэй байсан түүх бий. Бүлэг эсвэл зөвлөл байх нь чухал биш. МАН-д Эрүүл мэндийн сайдаар ажиллах хүн алга уу? Л.Оюун-Эрдэнийн Засгийн газар хариуцлагаа бүрэн хүлээж, өөрсдөө шинэ танхимаа бүрдүүлэх ёстой. АН-аас шинэ танхимд орохоор ярьж явсан гишүүдээ бид намын гишүүнээс хасав.
УИХ-ын гишүүн асан О.Баасанхүү: С.Одонтуяаг УИХ-ын дэд даргын албан тушаалаас чөлөөлүүлнэ. О.Цогтгэрэл гишүүнийг шалгуулна. Эдгээр гишүүд явуургүй улс төр хийсэн. Бүлэг байгуулах нь намын шийдвэр байдаг. УИХ-ын гишүүн өөртөө давуу байдал олгох хууль санаачлахыг хориглодог. Гэтэл О.Цогтгэрэл гишүүн өөрийгөө намын даргад сонгуулах хууль санаачилсан.
УИХ-ын гишүүн Д.Ганбат: Сандал ширээний төлөө ширүүн тэмцэл өрнөж байна. Үндсэн хуулийн цэцийн шийдвэр эмх замбараагүй байдал үүсгэв. Цаашид УИХ Засгийн газраа хянаж чадахааргүй боллоо. АН-ын зөвлөлд УИХ-ын гишүүн Б.Бат-Эрдэнэ, Д.Ганбат, А.Адъяасүрэн, С.Ганбаатар нар үлдэж ажиллана. Хэрэв АН Засгийн газрын бүрэлдэхүүнд багтвал сонгогчид бидэнд итгэхгүй гэв.
УИХ-ын гишүүн О.Цогтгэрэл, Ц.Туваан, С.Одонтуяа, Ш.Адьшаа нарыг намын гишүүнээс хасжээ.
