ЭХЭМҮТ-д нийт 230 саа саажилттай хүүхдийг мэдрэлийн, мэдрэлийн мэс заслын, сэргээн засахын эмч нарын хамтарсан үзлэгт наймдугаар сард багтаан хамруулжээ. Энэ сарын 1-3 өдрүүдэд 38 хүүхдэд үзлэг оношилгоо хийж, долоон хүүхдэд хагалгааны заалттай болохыг тогтоосон байна. Эхний таван хүүхдэд мэдрэлийн ёзоор тайрах хагалгааг Турк болон Монгол эмч нарын баг хамтран Улсын Гуравдугаар Төв эмнэлэгт амжилттай хийлээ. Энэ талаар Эрүүл мэндийн яамнаас мэдээлэл өгсөн юм.
ЭМЯ-ны Эмнэлгийн тусламж үйлчилгээний газрын дарга Ж.Нарангэрэл” Манай улсад 1700 гаруй саа саажилттай, уналт таталттай хүүхэд байдаг. Тэдний зарим нь доод мөчний саатай, дөрвөн мөчний саатай хүүхдүүд байдаг. Эдгээр хүүхдүүд мэдрэлийн ёзоор тайрах хагалгааг заавал хийлгэх шаардлагатай. Энэ хүрээнд бид ЭХЭМҮТ-д үзлэг оношилгоо хийж эхний ээлжид яаралтай хагалгаанд орох таван хүүхдэд турк болон монгол эмч нарын хамтаар амжилттай хагалгааг хийгээд байна. Цаашид бид энэ төрлийн хагалгааг эх орондоо хийж эмчлүүлэх боломжийг хангахаар ажиллаж байна. Мөн дараагийн ээлжид бид ирэх сард хоёр өөр улсаас энэ төрлийн хагалгааг хийх багийг урьж авчрахаар ажиллаж байгаа. Түүнчлэн, ирэх жилээс мэдрэлийн ёзоор тайрах хагалгааг эрүүл мэндийн даатгалын сангаас санхүүжүүлнэ” гэлээ.
Улсын гуравдугаар төв эмнэлгийн дарга Ц.Төмөр-Очир” Эрүүл мэндийн сайдын тушаалаар батлагдсан үндэсний баг Турк улсаас ирсэн мэргэжлийн багтай хамтран таван хүүхдэд мэдрэлийн ёзоор тайрах хагалгааг амжилттай хийгээд байна. Өнөөдрийн байдлаар хагалгаанд орсон хүүхдүүдийн биеийн байдал сайн байна. Энэ долоо хоногтоо шархны байдлаас шалтгаалаад ЭХЭМҮТ рүү шилжүүлэх бэлтгэл ажлыг хангаад байна. Энэхүү хагалгаа нь тархины саажилттай хүүхдүүдийн мэдрэлийн ёзоорыг 20-80 хувьд тайралт хийдэг. Дунджаар тухайн мэдрэлийн 50 хувь хүртэл буюу бүтэн тайрахгүй. Хагалгааны үр дүнгийн хувьд мэс заслын дараах эрт үед бол таталт чангарал өгч байсан булчингууд нь харьцангуй суларсан байдалтай байна. Хагалгааны дараа урт хугацааны сэргээн засах эмчилгээ хийх хэрэгтэй. Ингэснээр хагалгаа илүү үр дүнгээ өгнө гэдгийг Турк улсын эмч нар хэлж байна” гэв.
