Энэ оны тавдугаар сарын 1-нээс эрүүл мэндийн урьдчилан сэргийлэх үзлэг шинжилгээ, оношилгоог орон даяар хийж эхэлсэн.
Эрт илрүүлэг, үзлэг шинжилгээнд есдүгээр сарын 29-ний байдлаар 354,141 иргэн хамрагдсан талаар Эрүүл Мэндийн Яам (ЭМЯ)-наас мэдээлэв. Уг үзлэг, оношилгоонд хамрагдсан иргэдийн
- 44.4 хувь нь эрэгтэйчүүд,
- 55.6 хувь нь эмэгтэйчүүд байгаа аж.
Улсын хэмжээнд иргэдийн хамрагдалт жигд байгаа бөгөөд Улаанбаатарт 51 хувь, орон нутагт 49.9 хувь тус тус үзлэг шинжилгээнд оржээ. Түүнчлэн үзлэгт хамрагдсан иргэдийн 64.7 хувь нь 0-17 насныхан байгаа бол 35.3 хувь нь 18-аас дээш насны иргэд байгаа гэдгийг ЭМЯ-ныНийтийн эрүүл мэндийн газрын дарга Д.Баярболд хэллээ.
Тэрбээр “Үзлэг шинжилгээнд хамрагдсан 350,000 гаруй иргэнээс 314,000 иргэдийн үзлэгийн дүгнэлт гарч дууссан. Одоогоор 41,000 иргэний үзлэг шинжилгээ үргэлжлэн явагдаж байна. Эрүүл мэндийн үзлэг шинжилгээндээ бүрэн хамрагдсан 314,000 иргэний 189,106 иргэнд өвчний сэжигтэй тохиолдол бүртгэгдсэн. Бүртгэгдсэн өвчлөлийн сэжигтэй тохиолдлын
- 57.9 хувь нь эмэгтэйчүүд
- 42.1 хувь нь эрэгтэйчүүдэд байна.
Эрт илрүүлэг, үзлэг шинжилгээгээр гарсан сэжигтэй тохиолдлуудыг шаардлагатай тохиолдолд лавлагаа шатны эмнэлэгт нь онош тодорхойлуулж, цааш баталгаажуулалт хийлгэхээр ажиллаж байна” гэдгийг хэлэв.
Мөн үргэлжлүүлэн “0-17 насны хүүхдийн үзлэгээр 90,384 өвчлөлийн сэжигтэй тохиолдол бүртгэгдсэн. Тодруулбал, 73 хувь нь шүд цоорох, 2.9 хувь нь шүдний гажиг, хоёр хувьд нь хараа муудах эмгэг эзэлж байна.
Халдварт өвчний нийт 4,484 сэжигтэй тохиолдлыг илрүүлж, ХӨСҮТ-д шилжүүлэн дараагийн шатны хяналтдаа авч, онош баталгаажуулах ажил хийгдэж байгаа. Эрүүл мэндийн эрт илрүүлгийн хүрээнд сүрьеэ, ДОХ, тэмбүү болон элэгний B, С вирусийн халдварыг илрүүлэх шинжилгээг хийж байна. Мөн хугацаанд хортой болон хоргүй хавдрын 1,357 тохиолдлыг илрүүлж, ХСҮТ-д илгээн онош баталгаажуулах ажлыг хийж байгаа.
Энэ удаагийн эрт, илрүүлэг үзлэг шинжилгээнд сэтгэцийн эрүүл мэндийн үзлэг багтсан. Сэтгэцийн эрүүл мэндийн үзлэгийг бүх насныханд асуумж судалгаагаар хийж байгаа. Одоогоор нийт 230 иргэнд сэтгэц, зан төрхийн эмгэгийн сэжигтэй тохиолдол илэрч буй. Насны бүлгээр авч үзвэл, 6-17 насны хүүхдүүдэд сэтгэц, зан төрхийн өөрчлөлтийн сэжигтэй тохиолдлыг илрүүлсэн дүнтэй байна” гэдгийг хэлэв.
