Төрийн ордны чуулганы танхимын үүдэнд АН-аас УИХ-ын дарга Г.Занданшатар, Ерөнхий сайд Л.Оюун-Эрдэнэ нарт албан шаардлага хүргүүлж байгаа тухайгаа мэдээллээ.
-Нийслэлийн АН-ын дэд дарга А.Цэрэнбат:
-АН-ын Үндэсний бодлогын хорооны 2022 оны аравдугаар сарын 13-ны өдрийн Намрын анхдугаар хуралдаанаар “Монгол Улсын 2023 оны төсвийн төсөл”-ийг хэлэлцэж, санал дүгнэлт гаргалаа.
Монгол Улсын 2023 оны төсвийн төсөл нь эрх баригч улс төрийн хүчин болох МАН-ын зүгээс 2024 оны сонгуульд бэлтгэсэн, төрийн эрх мэдлийг хууль бусаар авахад чиглэсэн луйврын төсөв болсон гэж Ардчилсан намын Үндэсний бодлогын хорооны гишүүд санал нэгтэйгээр дүгнэсэн гэв.
АН-аас дараах шаардлагыг хүргүүлж байна. Үүнд Монгол Улсын 2023 оны төсвийн төслийг Засгийн газар нэн яаралтай эргүүлэн татан авч, Үндсэн хууль болон холбогдох хуулиудын хүрээнд Монголын ард түмний нийтлэг эрх ашигт нийцсэн төсвийн төслийг дахин хянан боловсруулж, өргөн барихыг шаардав.
Түүнчлэн:
- УИХ-ын дарга Г.Занданшатар,
- ЗГХЭГ-ын дарга Д.Амарбаясгалан,
- Сангийн сайд Б.Жавхлан,
- ХХААХҮ-ийн сайд Х.Болорчулуун,
- Монголбанкны Ерөнхийлөгч Б.Лхагвасүрэн,
- ЦЕГ-ын дарга Ж.Болд нарыг нэн даруй огцруулахыг шаардлаа.
Шаардлагын хариуг 2022 оны аравдугаар сарын 19-ний дотор АН-д албан ёсоор мэдэгдэхийг шаардлаа. Шаардлагыг хүлээн авч биелүүлээгүй тохиолдолд АН-ын зүгээс бусад улс төрийн нам, олон нийтийн байгууллагууд , иргэд, сонгогчдын өргөн оролцоотойгоор эсэргүүцлийн жагсаал зохион байгуулах, бүх нийтийн ажил хаялтад уриалах, зохион байгуулах зэрэг шат дараалсан тэмцлийг хийнэ гэдгээ анхаарууллаа.
-АН-ын дарга С.Эрдэнэ:
-Монгол Улсын 2023 оны төсвийн төслийг эгүүлэн татаж, алдаагүй засахгүй бол АН цаашдаа улс төрийн идэвхтэй тэмцэлд шилжиж ажиллах шийдвэрээ гаргасан. Энэ чиглэлд ажиллана.
Улс орны нийгэм, эдийн засаг, иргэдийн ажил, амьдрал ямар байгаа билээ. Иргэдийн амьдрал өдөр өдрөө хүндэрч байна. Төрөөс нийгэмд тустай бодлого, шийдвэр ерөөсөө гарахгүй байна. Төсвийн хөрөнгөөр УИХ-ын дарга нь анимэйшн хийдэг. Ийм байдлаар бид урагшлахгүй. Тиймээс нэр бүхий хүмүүсийг огцруулах шаардлага өгч байна.
