Мягмар гаригт Өмнөд Солонгос улсын хэмжээнд ковидын шинэ халдварын тохиолдол огцом өсөн нэмэгдсэн талаар холбогдох албаны зүгээс мэдээлжээ. Өчигдөр тус улсын хэмжээнд нийт 43700 шинэ халдвар бүртгэгдсэн нь өнгөрсөн долоо хоногийн мягмар гаригтай харьцуулахад 10 мянгаар нэмэгдсэн үзүүлэлт болоод байна. Харин 2 долоо хоногийн өмнөхтэй харьцуулахад 28 мянгаар нэмэгджээ.
Түүнчлэн өнгөрсөн 9 дүгээр сарын 21-ний өдрөөс хойш нэг өдөрт бүртгэгдсэн шинэ халдварын тоо хэмжээ анх удаа 40 мянгыг давсан тохиолдол болсон байна. Өчигдөр БНСУ‑д 17 хүн ковидын улмаас нас барж, 225 өвчтний биеийн байдал маш хүнд байгааг эрүүл мэндийн албаныхны зүгээс мэдээлжээ. Цаг агаар хүйтэрч, өвлийн улирал эхлэх гэж байгаатай холбоотойгоор ийнхүү тус улсад ковидын халдвар өсөн нэмэгдэх хандлага ажиглагдаж эхлээд байна.
Коронавирусийн мутацид орж хувирсан BQ.1 хэмээх дэд хувилбар тархах магадлал өндөр байгааг эрүүл мэндийн албаныхан даваа гаригт анхааруулсан байна. Дээрх мэдэгдэлд “хэрвээ өдөрт бүртгэгдэх шинэ халдварын хэмжээ 20 мянга байж байгаад үүнээсээ гэнэт огцом нэмэгдвэл ковидын халдвар өсөн нэмэгдэж эхэлснийг батлан харуулах болно” гэсэн нь мягмар гаригт батлагдаад байна. Албаныхны хэлснээр халдварын тоог нэмэгдүүлэх гол шалтгаан болж байгаа BQ.1 болон BQ.1.1 дэд хувилбарууд нь өмнөх Омикроны BA.5 хувилбараас гарсан шинэ дэд хувилбарууд бөгөөд халдварлах хүчин чадлын хувьд сул гэдгийг хэлсэн байна. Хэдийгээр ихэнх тохиолдолд энгийн ханиад хэлбэрээр илрэх боловч олон нийтийг анхаарал, болгоомжоо сулруулахгүй байхыг анхааруулжээ.
Түүнчлэн өнөөдөр БНСУ-ын Эрүүл мэндийн яамнаас өвлөөс өмнөх вакцинжуулалтын талаар мэдэгдэл гаргахаар болсон байна. Дээр дурьдсан BQ.1 болон BQ.1.1 дэд хувилбарууд нь өнгөрсөн долоо хоногт АНУ‑д шинээр бүртгэгдсэн ковидын халдварын 16 хувийг эзэлж байсан байна. Европын Халдварт өвчний хяналт болон урьдчилан сэргийлэх төвөөс мэдээлснээр ковидын дэд хувилбарууд нь хүйтэрч байгаатай холбоотойгоор ойрын долоо хоногуудаас эхлэн Европын халдварын тоо хэмжээг нэмэгдүүлж болзошгүй байгааг анхааруулжээ.
Жонс Хопъинсийн их сургуулиас өгч байгаа мэдээллээр өнөөдрийн байдлаар дэлхийн хэмжээнд бүртгэгдсэн нийт ковидын халдвар 628 саяыг даваад байгаа бол дэлхийн хэмжээнд ковидын улмаас нас барсан хүний тоо 6,581,723 болжээ. Харин ДЭМБ-аас өгч байгаа тоон мэдээллээр сүүлийн 24 цагийн дотор дэлхийн хэмжээнд 216,809 шинэ халдвар бүртгэгдсэн байна.
Эх сурвалж: Arirang news
