ШӨХТГ-ын дарга С.Мөнхчулуун үүрэн холбооны оператор компаниудын үйл ажиллагаанд хяналт шалгалт хийсэн талаараа мэдээлэл өглөө.
Тэрбээр “Уг шалгалтын үр дүнгээр Юнител, Мобиком, Скайтал, Жимобайл гэсэн дөрвөн компанид зөрчлийг арилгах албан шаардлагыг хүргүүлсэн. Эхний ээлжинд Юнител болон Жимобайл компаниас албан шаардлагын биелэлтийн талаар хариу ирээд байна.
Юнител компанийн зүгээс хэрэглэгчдийн дата багц дуусаж, задгай дата үйлчилгээнд шилжих задгай датаны хэрэглээний тарифын талаарх мэдээллийг илгээдэг мессежийн агуулга нэмж тусгахаар болсон. Мөн цэнэглэгч картын мэдээлэлд хоног эсвэл нэгж сунгагдах талаар хэрэглэгчдэд урьдчилан шаардлага хангах хэмжээнд өгдөг байх өөрчлөлт хийгдсэн гэсэн хариу ирүүлсэн байна.
Харин Жимобайл компанийн зүгээс багц бууруулахтай холбоотой өөр хоорондоо нийцдэггүй үйлчилгээний журмыг өөрчлөх, нэмэлт дата багц идэвхжүүлэхэд тухайн сарын үлдэгдэл дата хүчингүй болдог байсан нөхцөлд өөрчлөлт оруулах, мөн гэрээний нөхцөлд хэрэглэгч гэрээг цуцлах нөхцөлийг тусгахтай холбоотой техникийн тохиргооны өөрчлөлтийг энэ оны арванхоёрдугаар сард багтаан хийнэ гэсэн мэдээлэл ирүүлсэн.
Үлдсэн хоёр компанийн хувьд хэрэгжүүлсэн ажлынхаа тайланг ирүүлэх ёстой. Албан шаардлагыг биелүүлээгүй тохиолдолд Зөрчлийн тухай хуулийн дагуу дараагийн шатны арга хэмжээ авах болно” гэсэн юм.
Түүнчлэн гуравласан үйлчилгээ үзүүлдэг оператор компаниудын талаар “Тус компаниуд үнээ өөрчлөхдөө сонин юм уу нэг хэвлэл мэдээллийн хэрэгсэл дээр зар гаргадаг. Энэ нь хэрэглэгчдэд сонголтгүйгээр үнээ шахаж буй явдал. Үнэ нь гэрээний хамгийн том нөхцөл байдаг. Хэрэглэгчдийг хохироож байна гэж үзэн хяналт шалгалт хийж байна. Хэрэглэгчтэй байгуулж буй гэрээ, тушаал шийдвэрийг шалгаж байна” гэлээ
