Монгол Улсын Ерөнхийлөгч Ухнаагийн Хүрэлсүх арваннэгдүгээр сарын 27-28-ны өдрүүдэд БНХАУ-ын дарга Ши Жиньпиний урилгаар тус улсад төрийн айлчлал хийнэ. Энэ нь У.Хүрэлсүхийн Монгол Улсын Ерөнхийлөгчөөр сонгогдсоны дараа БНХАУ-д хийж буй анхны айлчлал юм.
Тэгвэл Ерөнхийлөгч Хятадад хийх айлчлалаа өндөрлүүлээд шууд Япон улсад төрийн айлчлал хийх аж. Тодруулбал, Япон Улсын Засгийн газрын урилгаар Монгол, Японы хооронд дипломат харилцаа тогтоосны 50 жилийн ойг тохиолдуулан 2022 оны арваннэгдүгээр сарын 29-нөөс арванхоёрдугаар сарын 02-ны өдрүүдэд Япон Улсад төрийн айлчлал хийнэ.
Монгол Улсын Ерөнхийлөгч Ухнаагийн Хүрэлсүх Япон Улсын Цог Жавхлант Эзэн Хаан Нарүхито-д бараалхаж, Япон Улсын Ерөнхий сайд Ф.Кишида-тай албан ёсны хэлэлцээ хийнэ.
Мөн Японы Парламентын Төлөөлөгчдийн танхимын дарга Х.Хосода, Зөвлөхүүдийн танхимын дарга Х.Оцүжи нарыг хүлээн авч уулзана.
Айлчлал Монгол, Японы харилцааг гүнзгийрүүлэх, ард түмний найрамдал, нөхөрлөлийг бэхжүүлэх, хагас зуун жилийн хамтын ажиллагааг дүгнэж, ирэх 50 жилд хөгжүүлэх хэтийн төлөв, чиглэлийг тодорхойлох чухал ач холбогдолтой.
Энэ удаагийн айлчлал Монгол Улсын төрийн тэргүүний түвшинд 2010 оноос хойш 12 жилийн дараа болох гэж байна.
