Цар тахал эхэлснээс хойш Хятадад коронавирусийн шинээр илрэх халдварын тохиолдол дээд цэгтээ хүрээд буй. Гэвч тус улсад өнгөрсөн долоо хоногт болсон олон нийтийн жагсаалын улмаас томоохон хотууддаа хөл хорионы дэглэмийг ням гарагаас эхлэн сулруулжээ.
Эрх баригчид орон даяар шинээр илрэх халдварын тохиолдол буурч байна гэж ням гарагт мэдэгдсэн байна. Гэвч өдөрт илрэх тохиолдлын тоо 32 мянгад хүрээд байгаа бөгөөд энэ нь шинжилгээг бууруулсантай ч холбоотой аж. Түүнчлэн эрх баригчид хоёр хүн нас барсан тухай мэдээлжээ.
Хятадад халдварын тархалтыг дарахад барууны орнуудад үйлдвэрлэсэн ковидын эсрэг вакцин туслах боломжтой ч БНХАУ-ын дарга Ши Жинпин үүний эсрэг байгаа талаар АНУ-ын Үндэсний тагнуулын газрын тэргүүн Аврил Хейнс хэлжээ. Коронавирусийн халдварын үр дүн нь нийгмийн болон эдийн засгийн үр дагавар дагуулж болзошгүй ч Ши Жинпин барууны сайн вакцины оронд омикрон хувилбарт төдийлөн сайн нөлөөлөхгүй хятад вакциныг илүүд үзэж байна гэж тэрээр хэлсэн байна.
ХОТУУД ХӨЛ ХОРИОГОО СУЛРУУЛЛАА
Олон сар хаалттай байсны эцэст хотын худалдааны төвүүд, зах, зоогийн газар болон бусад үйлчилгээний байгууллагууд үүдээ нээж байгаа талаар хотын захирагчид мэдээлсэн байна. Улмаар амралтын өдрүүдэд хотуудад эмх замбараагүй байдал үүсээгүй бөгөөд Бээжин, Шанхай хотноо цагдаа нар хамгаалалтад зогсоцгоожээ.
Мөн бямба гарагт Бээжингийн захиргаанаас халуун бууруулах, ханиад, хоолойн өвчин намдаах эмнүүдийн хориог зогсоосон байна. Учир нь хүмүүс халуун бууруулах эмээр ковидын шинж тэмдгээ нуух магадлалтай хэмээн хязгаар тогтоогоод байжээ.
Мөн Бээжин хотын зарим дүүргийн захиргаанаас шинжилгээний хариу нь эерэг гарсан хүмүүс гэртээ өөрийгөө тусгаарлах боломжтой болсон гэж мэдэгдсэн байна. Шанхай хотын захиргаанаас нийтийн тээврээр үйлчлүүлэх болон цэцэрлэгт хүрээлэнд очихын тулд шинжилгээний сөрөг хариу заавал шаардахааргүй болсон гэжээ.
Эх сурвалж: ВВС
