УИХ-ын гишүүн Ч.Ундрамын нөхөр хувийн амьдралынхаа талаар цахим хуудаснаа нийтэлснээр тэр олны анхаарал, шүүмжлэлд өртөөд буй юм. Тэр 12-р сарын 6-нд нөхрийнхөө хийсэн мэдэгдэлд тайлбар өгч “Улаан бал” нэвтрүүлэгт орсон бөгөөд энэ үеэрээ “Би чөлөөт цагаараа өөрийнхөө гэрт, нөхөртөө уйлаад бухимдлаа гаргасан нь ёс зүйн асуудал уу? Би ордонд архидаж байгаад хүн унагаад алчихаагүй шүү дээ. Би ордонд зодоон хийгээгүй, төрийн мөнгөнөөс хулгайлаагүй. Би ёс зүйн ямар асуудал гаргасан юм бэ. Ард түмэнд яагаад миний асуудалд анхаарлаа төвлөрүүлээд байгаа юм бэ. Анхаарлаа тэр олон хулгайч нар луугаа чиглүүл л дээ! гэжээ.
Төрийн ордонд 2019 оны тавдугаар сарын 17-нд УИХ-ын гишүүн асан Г.Батхүү амиа алдсан бөгөөд хэргийн учир шалтгаан тогтоогдоогүй, ар гэрийнхэн нь гомдол тээн өнөөг хүрсэн юм. УИХ-ын гишүүн Ч.Ундрамын дээрх мэдэгдэл талийгаачийн гэр бүлийнхнийг анхаарлыг татсан байна.
Г.Батхүү агсны дүү П.Батчимэг энэ ярилцлагын талаар үзэл бодлоо илэрхийлээд, Төрийн ордонд хүн нас барсан асуудлыг хөндсөн ба хууль хяналтын байгууллага уг ярилцлагад анхаарал хандуулахыг цахим хуудсаараа дамжуулан хүссэн байв.
Тэрбээр,
“….Төрийн ордонд архидаж, эрдэнэт хүний амь насыг түлхэн унагаж, санаатай бүрэлгэснийг хүртэл гишүүн Ч.Ундрам баталгаатай мэдэж ярьж сууна. Өөрийн гэртээ өөрийн нөхөртэйгээ өөрийн дураар авирлаж байхад нь ард түмэн юунд сонгосон эрхэм гишүүнийхээ хувийн асуудалд анхаарлаа нээрээ хандуулаад байгаа юм бол… Хуулийн байгууллага одоо уг ярилцлагад анхаарлаа хандуулж, төрийн ордонд болсон санаатай, зохион байгуулалттай уг “ аллага”-ын талаар олон нийтэд мэдээлэл өгөх нь үнэнд нийцтэй. Хардах эрх нь бидэнд бий. Ч. Ундрам гишүүн 2019 оны 5 дугаар сарын 17-ны орой Төрийн ордонд үйлдэгдсэн ноцтой хүн амины хэргийн үйлдсэн “эзнийг” мэдээд яриад байгаа бус уу. Олон олон сайтууд, иргэд, олон нийтийн сүлжээ сануулаад анхаарал хандуулаад эхэллээ” хэмээн бичжээ.
