Авто замын түгжрэл ихтэй хотуудын тоонд зүй ёсоор багтдаг Бангладеш улсын нийслэл Дака хот Япон улсын санхүүжилтээр бүтээн байгуулсан метроны анхны шугамаа нээж байна.
Хөнгөн галт тэрэгний тээврийн ангилалд орох энэхүү төслийн 20 км урттай эхний шугамын нэг хэсгийг энэ лхагва гарагт нээж, иргэдэд үйлчилж эхэлжээ. “VI шугам” хэмээн нэрлэсэн энэ шугам нь одоогоор Дака хотын хойд хэсгийг Төрийн байгууллагууд, эмнэлгүүд байрладаг төв хэсэгтэй холбох аж. Яваандаа шугамыг хотын өмнөд хэсгийн Мотижхел санхүүгийн дүүрэг хүртэл өргөтгөхөөр төлөвлөжээ.
Шинэ шугамын нээлтийн ёслолд Бангладеш улсын Ерөнхий сайд Шейх Хасина оролцсон бөгөөд энэхүү үйл явдал нь 2024 онд болох сонгуулийн өмнө түүний тэргүүлдэг Засгийн газарт нэр хүндээ өсгөхөд нь томоохон давуу тал олгох боломжтой аж.
10.3 сая хүн ам 305 км.кв газар нутагт төвлөрөн амьдардаг Дака хотод замын түгжрэл, нийтийн тээвэр тулгамдсан асуудал болсоор ирсэн юм. 10 жилийн өмнө тус хотод автомашинаар зорчих дундаж хурд 21 км/цаг байсан бол өдгөө ердөө долоон км/цаг болж буурсан бөгөөд цаашид энэ байдал үргэлжилбэл дөрвөн км/цаг буюу алхахаас ч удаан болох төлөвтэй гэж Дэлхийн банк тооцоолжээ. Замын түгжрэлээс шалтгаалан Дака хотод өдөр бүр ажлын 3.2 сая цаг үр ашиггүй өнгөрөхийн зэрэгцээ хотын эдийн засагт жил бүр олон тэрбум ам.долларын хохирол учруулдаг байна.
“Economist Intelligence Unit” байгууллагаас дэлхийн 172 хотыг хамруулан тооцдог “Global Livability Index”-ээр Дака хот “Амьдрахад хамгийн таагүй хотууд”-ын долоодугаарт бичигджээ.
“Метроны шугам нээгээд түгжрэл тэр даруй арилна гэдэг нь гэнэн бодол болох”-ыг Дэлхийн банкны Ерөнхийлөгчийн албаны зөвлөх Мартин Рама онцолж байна.
Бангладеш улс 2012 онд “VI шугам”-ыг барьж байгуулахаар 2.1 тэрбум ам.доллар төсөвлөснөөс 1.6 тэрбум ам.долларыг нь Япон улс санхүүжүүлжээ. Хожим эрх баригчид энэхүү шугамыг хотын төв галт тэрэгний буудалтай холбох шийдвэр гаргаснаар өртөг нь 3.2 тэрбум ам.доллар болж нэмэгдсэн аж.
Япон улс Дака хотод дахин метроны хоёр шугамын төслийг санхүүжүүлж байгаа юм байна. Метроны гурван шугам ашиглалтад орсноор өдөрт хоёр сая зорчигч тээвэрлэх тооцоо гарсныг Японы Олон улсын хамтын ажиллагааны агентлаг мэдээллээ.
