УИХ-ын чуулганы нэгдсэн хуралдаанаар Засгийн газрын тусгай сангийн тухай хуульд өөрчлөлт оруулах тухай хуулийг хэлэлцэж байна. Уг хуулийн төсөлд Хөдөө аж ахуйг дэмжих санг татан буулгаж, төрийн өмчит корпорац байгуулах асуудлыг тусгажээ.
Энэ үеэр УИХ-ын гишүүн С.Одонтуяа “Сүүлийн үед иргэд төрийн өмчит компанид огт итгэхээ больсон. Хөгжлийн Банкны сонсголын үеэр та бүхэн харсан л байх. Хөдөө аж ахуйг хөгжүүлж, хувийн хэвшлээ дэмжинэ гэдэг агуулга зорилго нь зөв сонсогдож байна. Хөгжлийн Банк ч бас улс орны хөгжлийг өөд нь татах төсөлд зээл өгнө гэж байсан. Гэтэл хэлбэр нь болохгүй байна.
МАН-ын бодлого гээд 10 их наяд төгрөгийн зээл өгөөд л бүх хүнийг ядуурлаас гаргана гэсэн ч жижиг бизнес эрхлэгчдэд тэр зээл очоогүй. 10 их наяд төгрөгийн зээл банкуудад очсоноос долоо хоногийн дараа Монгол Улсын хадгаламж тав дахин өссөн гэдгийг Эдийн засгийн байнгын хорооны дарга ярьж байсан.
Хүмүүсийн итгэлийг сулруулсан зүйл болчих вий. Өнөөдрийн яригдаж байгаа корпорац том, жижиг бизнес эрхлэгчдийн алийг нь дэмжих вэ? Тариалан дэмжих сан гэж байхад томоохон компаниуд зээл авсан. Зээл нь төлөгдөөгүй учир бүх материалыг нь жалганд аваачиж шатаасан гэдгийг тухайн үед хэвлэлээр бичиж байлаа. Өмнөх өрөө яаж барагдуулах юм бэ? Хөдөө аж ахуйг дэмжих сангийн өрийг ил болгох хэрэгтэй.
Эдийн засгийн үр ашгийн тооцоог нь асуумаар байна” хэмээв.
Харин ХХААХҮ-ийн сайд Х.Болорчулуун “Хөдөө аж ахуйг дэмжих сан гээд яваад байж болохгүй байна. Өр нь жилээс жилд нэмэгдээд байгаа юм. Корпорац болгож аж ахуйн тооцоон дээр ажиллуулах зайлшгүй шаардлагатай. Цаашдаа компани болно. Энэ компанийн хувьцаа эзэмшигч ХХААХҮЯ байгаа. Цаашид олон нийтийн хяналтад оруулах зорилготой. Тус корпорац хувийн хэвшлийнхний хийж болж байгаа зүйлтэй өрсөлдөхгүй. Харин төрөөс олгож байгаа дэмжлэг уг компаниар дамжина. Хамгийн гол нь өрийг нь цэгцлэх асуудал байгаа юм.
Бараг малчин болгонд БНХАУ-ын ногоон тракторыг 50 хувийн хөнгөлөлттэй үнээр тараасан. Өр нь сан дээр үүсээд байна. Том эсвэл жижиг бизнес эрхлэгчийн аль нэгийг нь дэмжинэ гэсэн үг биш. Цаашид корпорац хөдөө аж ахуй эрхэлдэг бүхий л компанид дэмжлэг үзүүлж ажиллах болно” гэдгийг хэллээ.
