Олон өдөр үргэлжилсэн усархаг борооны улмаас Улаанбаатар хотод үүссэн нөхцөл байдлыг арилгах чиглэлээр холбогдох байгууллагынхан ажиллаж байна. 22.00 цагийн байдлаар Нийслэлийн онцгой комисс хуралдаж байна.
“Ийм хэмжээний усархаг бороо сүүлийн 50 жилд ороогүй. Усны түвшин өнөө шөнө нэмэгдэх эрсдэлтэй” гэж усны мэргэжилтнүүд болон онцгой байдлынхан ярьжээ. Долоодугаар сарын 5-ны 22.00 цагийн байдлаар бороо шивэрч байгаа бөгөөд ЦУОШГ-аас энэ сарын 10-ныг хүртэл бороо үргэлжлэн орно гэж мэдээлсэн билээ. Бороо үргэлжлэн орж, усны түвшин нэмэгдсээр байгаа нь эрсдэлийн шалтгаан болж байна.
Үерийн улмаас Баянзүрх дүүрэгт 10 мянган айлын цахилгааныг тасалсан бөгөөд одоогоор 5000 айлын цахилгааныг холбосон байна. Үерийн усыг бүрэн соруулж дуусаагүй учир цахилгаан холбоогүй байна гэсэн мэдээллийг Улаанбаатар цахилгаан түгээх сүлжээ ТӨХК-ийн Гүйцэтгэх захирал Р.Дагдан өгчээ.
Усанд автсан хорооллууд болон үерийн далан сэтэрсэн газруудад нийслэлээс нийт 500 орчим албан хаагч 12 цагаар ээлжлэн тасралтгүй ажиллаж байна. Үүн дээр зэвсэгт хүчнээс 200 албан хаагч хүч нэмэгдүүлэн ажиллахаар болжээ.
НОК-ын хуралд найман байршилд маш эрсдэлтэй нөхцөл байдал үүсээд байна хэмээн танилцуулжээ. Хүндэрч болзошгүй нөхцөл байдал:
- Баянзүрх дүүрэг – Сэлбэ голын далан
- Баянзүрх дүүрэг – Баянмонгол хороолол, Их наяд плаза
- Хан-Уул дүүрэг – Төв цэнгэлдэх хүрээлэнгийн хойно Соёмботой хөшөө
- Хан-Уул дүүрэг – Уран ган, шинэ гүүр
- Баянгол дүүрэг – Алтай хотхон, гүүр
- Баянгол дүүрэг – АПУ, шинэ гүүр
- Баянгол дүүрэг – Дэлгэрэх хотхон
- 100 айлын гүүрний зүүн дээд эрэг
Улаанбаатар хотын төвийн зургаан дүүрэг өндөржүүлсэн бэлэн байдалд шилжсэн бөгөөд НОК-ын хуралд нөхцөл байдлын талаар мэдээлэл өгч байна. НОК-ын хуралд ОБЕГ-ын дэд дарга, Бригадын генерал Б.Ууганбаяр тэргүүтэй албаны хүмүүс оролцож байна.
Нийслэлийн онцгой комиссын хурлын дараа Засаг дарга Д.Сумъяабазар тэргүүтэй албаны хүмүүс хүндэрсэн газруудад ажиллана. Өнөө орой 22.40 цагаас эхлэн Хан-Уул дүүргийн Соёмботой хөшөөний хойд талд авто замыг сэтэлсэн байршлаас эхлээд Хотын дарга тэргүүтэй хүмүүс ажиллах юм байна.
