Засгийн газраас зарласан “Монголд зочлох жил”, мөн Хөвсгөлаймгаас зарласан зочлох жилийн хүрээнд “Сарлаг наадам-2023”-ыг долоодугаар сарын 20, 21-нд зохион байгуулах гэж байна.
“Сарлагийн наадам-2023”-ыг Хөвсгөл аймгийн Засаг даргын Тамгын газар, Алаг-Эрдэнэ сумын Засаг даргын Тамгын газар, аймгийн Бэлчээр ашиглагчдын холбоо хамтран Алаг-Эрдэнэ сумын 5 дугаар багийн нутаг “Далан булаг”-т зохион байгуулах гэж байна.
Мөн Хөнгөн үйлдвэрийн судалгаа хөгжлийн хүрээлэн, аймгийн ХХААГ, БОАЖГ, Соёл урлагийн газар, Мал эмнэлгийн газар, Хатгал тосгоны Захирагчийн ажлын алба болон “Жинст Мөрөн” ХХК хамтран ажиллаж байна.
Энэ удаагийн наадмыг сарлаг үхрийн уралдаан, үндэсний сур харвааны тэмцээн, “Сарлаг-2023” яруу найргийн наадам, сарлагийн бух шалгаруулах, үзэсгэлэн-худалдаа гаргах зэргээр өргөн хүрээнд зохион байгуулахаар болжээ.
Хөвсгөл аймгийн Алаг-Эрдэнэ сум нь байгаль цаг уурын хувьд сарлаг маллах хамгийн таатай нутаг бөгөөд 2022 оны байдлаар 34 мянган толгой сарлаг үхэр тоолуулжээ. Сумын малчин өрхийн орлогын 30 орчим хувийг сарлагийн ашиг шимээс бүрдүүлдэг байна.
Тус сум 2014 оноос эхлэн “Сарлаг наадам”-ыг зохион байгуулж, гадаад дотоодын жуулчдын сонирхон ирж үздэг арга хэмжээ болж өргөжөөд байна. Улмаар “Сарлагийн наадам”-ыг Хөвсгөлаймагт гадаад, дотоодын жуулчид зочлоход зохион байгуулж буй аялал жуулчлалын эвэнт үйл ажиллагааны жагсаалтад оруулжээ.
