Японоос экспортолж буй хүнс, хөдөө аж ахуйн бүтээгдэхүүнүүд нь хаягдал уснаас үүдэлтэй цацраг идэвхт бодисоор бохирдох эрсдэлтэй гэж БНХАУ-ын Гаалийн байгууллага мэдээллээ.
“Fukushima Daiichi” станцын оператор “Tokyo Electric Power” компани Фүкүшимагийн цөмийн гамшигт өртсөн бүс нутаг дахь цэвэршүүлсэн хаягдал усыг Номхон далайд цутгаж эхэлсэнтэй холбоотойгоор БНХАУ Япон улсаас нийлүүлдэг далайн гаралтай бүх төрлийн бүтээгдэхүүнийг бүтээгдэхүүний импортод бүрэн хориг тавиад байна.
Олимпын наадмын 500 усан сан дүүргэх хэмжээний эзлэхүүнтэй, бүрэн шавхахад хамгийн багадаа 30 жилийн хугацаа шаардлагатай гэж тооцоолсон хаягдал ус цутгах үйл явцыг “буруу үйлдэл” хэмээн БНХАУ-ын тал дүгнэж байгаа аж. Харин Япон улс импортын хоригоо даруй цуцлахыг Бээжинд уриалаад байна.
БНХАУ Япон улсын далайн бүтээгдэхүүний экспортын хамгийн том худалдан авагч бөгөөд өнгөрсөн онд Японы компаниуд БНХАУ-ын зах зээлд 496 сая ам.долларын далайн бүтээгдэхүүний борлуулалт хийжээ.
Японы өөр нэг томоохон импортлогч Хонгконг ч мөн хүнсний импортод хязгаарлалт тавиад байна. Тухайлбал: Японы 10 мужаас далайн хоол худалдан авахыг хоригложээ. Түүхий эдийнхээ 40 гаруй хувийг Японоос авдаг Хонгконгийн суши ресторанууд үнийн эрс өсөлтөд бэлтгэж эхэлсэн байна.
“Цэвэршүүлсэн хаягдал усыг Номхон далайд цутгах Япон улсын энэхүү төлөвлөгөө нь цацрагийн аюулын хувьд хүрээлэн буй орчин болон иргэдэд тийм ч том нөлөө үзүүлэхгүй” гэж Олон Улсын Цөмийн Эрчим Хүчний Агентлагийн тэргүү онцолж байв. Тус байгууллагаас Япон улсын дээрх төлөвлөгөөг сүүлийн хоёр жилийн турш хянасан бөгөөд олон улсын стандартад нийцнэ гэж үзсэн байна.
Япон улс Фүкүшимагийн цөмийн гамшигт өртсөн бүс нутаг дахь цэвэршүүлсэн хаягдал усыг Номхон далайд цутгах ажлыг наймдугаар сарын 24-ний өдөр гэхэд эхлүүлээд байгаа аж.
