Архангайд аялж яваа Франц жуулчдын групптэй таарлаа. Тэдэнд тав тухтай жуулчны бааз, амралтын газар огт хэрэггүй.
Ердөө л онгон байгаль дээдийн тансаглал гэнэ.
Айл амьтны бараагүй, эзгүй газар шиддэг майханд хэд хонож байгаа аж. Олон машин тэрэг ч шаардлагагүй.
Хоёр пургонд хуваагдаж суугаад Монголоор аялж яваа аж. Уул хадаар алхаж, ус гол, цэцэг ургамалтай харьцаж, байгалийн эрчим энергээр биеэ цэнэглэх нь хамгийн гоё амралт гэнэ.
Намрын сэрүүн орой бүгд Монгол дээл өмсөөд, малгай ороолт өмсөж, ил гал тойрон хүүрнэлдэж, хөгжиж суух.
Манайхан шиг архидаагүй шүү.
Яагаад Монголыг сонгож аялж буйг асуувал- “Бид хөгжил дэвшил гэдгийг өндөр байшин, том хот, тав тухаа хангах гэж андуурч явжээ. Буруу явж буйгаа хожуу ч гэсэн ухаарч байна.
Монголчуудын байгалиа унаган хэвээр нь хадгалж, түүнд зохицуулсан ухаалаг, энэрэнгүй нүүдэлчин соёл бол үнэхээр гайхалтай.
Монголчуудын уламжлалт амьдралын хэв маяг, байгаль дэлхийгээ шүтэж, түүндээ дасан зохицсон ёс уламжлал бол өнөөдөр хамгийн үнэ цэнэтэй. Ийм соёл уламжлал хамгийн зөв байсныг ухаарч, үүн рүү өндөр хөгжилтэй орны иргэд бид тэмүүлж байна. Байгаль дэлхийгээсээ юу авсан түүнийхээ хирээр буцааж өгөхийг хүсэж байна.
Иймээс Монголчууд та бүхэн энэ соёл уламжлалаа алдалгүй, улам дэлгэрүүлж, байгаль дэлхийгээ ариун дагшин хэвээр нь авч үлдээрэй. Тэр цагт та бүхэн хүн төрөлхтний оюун санааны бахархал болно шүү” гэв.
Эх сурвалж: Баасанжавын Отгон
