НИТХ-ын ээлжит хурлаар Нийслэлийн Засаг дарга бөгөөд Улаанбаатар хотын захирагчаар Х.Нямбаатарыг сонгох эсэх асуудлыг хэлэлцэж байна. Өнгөрсөн долоо хоногт МАН-ын Удирдах зөвлөлөөс Нийслэлийн Засаг даргаар ХЗДХ-ийн сайд асан Х.Нямбаатарыг нэр дэвшүүлж, бүлэг нь дэмжсэн билээ.
НИХТ-ын гишүүд Нийслэлийн Засаг даргад нэр дэвшигчээс асуулт асууж хариулт авч байна. Энэ үеэр НИТХ-ын төлөөлөгч Д.Ганхуяг, П.Наранбаяр нар Х.Нямбаатарыг хэр тогтвортой ажиллах вэ. Удахгүй УИХ-ын сонгууль болоод ажлаа орхиод нэр дэвшээд явчих юм биш үү. Ер нь УИХ-ын сонгуульд нэр дэвшихгүйгээр орон нутгийн сонгуульд өрсөлдөж, дүнгээ тавиулах нь зүйтэй юм биш үү гэсэн асуултыг тавилаа.
Уг асуултад Нийслэлийн Засаг даргад нэр дэвшигч Х.Нямбаатар “Хэрэв намайг Нийслэлийн Засаг даргад НИТХ-ын төлөөлөгчид дэмжиж, Ерөнхий сайд захирамжилсан тохиолдолд би өөрт олгогдсон бүрэн эрхийн хугацааг дуустал ажиллах чин хүсэл эрмэлзэлтэй байгаа. Нутгийн өөрөө удирдах газартай хамтарч нийслэлийн тулгамдсан асуудлыг шийдэхийн төлөө ажиллана.
Товчхондоо, би 2024 оны УИХ-ын сонгуульд нэр дэвшихгүй. Орон нутгийн сонгуулийн бүрэн эрхийн хугацаа дуустал ажиллана. Орон нутгийн сонгуулийн ирээдүйн үр дүнг ярихад эрт байна.
Нэг зүйлийг хэлэхэд хотын өмнө тулгамдсан асуудлаар эрдэмтэн судлаач, мэргэжлийнхний үгийг сонсоно. Харин би шийдвэрийг бол гаргаад явна. Шийдвэр гаргахаас огт айхгүй. Учир нь аливаа шийдвэр бол асуудлыг шийдэхэд л чиглэдэг” гэлээ .
