Зуун буудалт даамын өсвөр, залуучуудын Дэлхийн Аварга Шалгаруулах Тэмцээн (ДАШТ) Польшийн Полице хотод зохион байгуулагдаж байна.
Тус ДАШТ нь эрэгтэй, эмэгтэй таван насны ангиллаар зохион байгуулагдаж байгаа юм. Өнөөдөр сүүлийн есдүгээр өргийн тоглолтууд 16:00 цагаас явагдаж дуусна.
Өчигдрийн наймдугаар өргийн дараах байдлаар манай улсын хоёр тамирчин дэлхийн аваргын болзлыг хангасан байна. Тодруулбал хөвгүүдийн 5-8 насанд Н.Хангай долоо хожиж, нэг хожигдсоноор 14 оноотойгоор, охидын 17-19 насанд Дэлхийн даамын холбооны мастер Б.Мөнхжин зургаа хожиж, хоёр тэнцсэнээр 14 оноотойгоор аваргын болзлыг хангажээ.
Мөн манай улсын эмэгтэй тамирчид сүүлийн өргийн тоглолтын дүнгээр дэлхийн аварга цолыг хүртэх магадлалтай байна. Тухайлбал
- 14-16 насанд Б.Есүй 12 оноотой тэргүүлж байгаа бол Нидерландын даамчин 11 оноотойгоор удаалж байна.
- 11-13 насанд Э.Даариймаа 13 оноотойгоор хүснэгтийг тэргүүлж байгаа бол Латвийн тамирчин 12 оноотой араас нь нэхэж явна.
- 9-10 насанд Э.Номунзаяа 12 оноотойгоор хүснэгтийн хоёрдугаар байрт бичигдэж байгаа бөгөөд Латвийн тамирчин 13 оноотой тэргүүлж байна. Тэрбээр сүүлийн өрөгт долдугаар байрт бичигдэж буй Г.Гэрэлмаатай тоглосноор тэмцээнээ өндөрлүүлнэ.
- Харин 5-8 насанд Б.Эрмүүнзаяа 11, Б.Энхмаа 10 оноотойгоор хүснэгтийг тэргүүлж байна. Манай хоёр тамирчин сүүлийн долдугаар өрөгт өрсөлдөгчтэйгөө тэнцсэн тохиолдолд дээрх үр дүнгээ хадгалж үлдэх юм. Мөн Б.Энхриймаа долоон оноотой дөрөвдүгээр байрт бичигдэж байгаа бөгөөд медальт шалгарах боломжтой.
Харин хөвгүүдийн 14-16 насанд А.Дашчирэв 10 оноотой тавдугаар байрт бичигдэж байгаа бөгөөд тэргүүлж буй тамирчнаас нэг онооны дутуу яваа юм. 11-13 насанд Т.Энхсүлд 12 оноотой гуравдугаар байрт бичигдэж байгаа. Тэрбээр сүүлийн өргийн тоглолтоор медальт байрт шалгарах эсэх нь шийдвэрлэгдэнэ.
Тэгвэл хөвгүүдийн 9-10 насанд манай улсын гурван даамчин эхний дөрвөн байрт бичигдэж байгаа юм. Тодруулбал Г.Санчир 13 оноотой нэгд, Д.Ангараг 12 оноотой хоёрт, Б.Маргад-Эрдэнэ 11 оноотой дөрөвт бичигджээ. Мөн адил сүүлийн өргийн тоглолтоор медалийн өнгөө шийдэхээр байна.
