УИХ-ын Төрийн байгуулалтын байнгын хорооны өнөөдрийн хуралдаанаар Нийслэл Улаанбаатар хотын замын хөдөлгөөний түгжрэлийг бууруулах, гэр хорооллыг орон сууцжуулах хуулийн төслийн хэлэлцэх эсэхийг хэлэлцлээ. Тус хуулийн төслийн Засгийн газраас аравдугаар сарын 31-нд өргөн барьсан билээ.
УИХ-ын гишүүн Ж.Сүхбаатар: Шилжилтийн үеийн зохицуулалт гэдгийн хугацааг нь хэлж өгөөрэй. Энэ бодлого чиглэлийг нь өмнөх хотын дарга бид хоёр гаргасан юм. Жилийн өмнөөс Засгийн газар дээр ийм хууль оруулах гээд байгаа шүү гэж хэлдэг байсан. Улаанбаатар хот гажуудчихсан учраас алдааг нь засах л болчихоод байгаа юм. Буруу яваад ирснийг нь зөв болгох, ингэхдээ эдийн засагтай нь яръя гэж байгаа юм. Хөгжлийн тухай ярих нь худлаа болчихоод байгаа юм.
Ганц метро бариад түгжрэл буурахгүй. Метро барина гэхэд нийтийн тээврийн сүлжээ сайн хөгжсөн байх ёстой.
Тэгж байж метро үр дүнгээ өгнө. Энэ хуулийг батлангуут хэрэгжүүлэхгүй. 2025 онд маш хүнд байдалд ороход энэ хууль амилна. Энэ бол олонход таалагдах хууль биш. 2025 он гэхэд хэн ч байсан энэ хуулийг хэрэгжүүлэх л болно.
Нийслэлийн Засаг дарга Х.Нямбаатар: Хэрвээ энэ хууль батлагдвал ердийн журмаараа хэрэгжинэ. Гол асуудал бол НИТХ үе шаттай журмууд гаргаж зохицуулалт хийнэ. Ямар ч арга хэмжээ авахгүй яваад байвал өдөр өдрөөр Улаанбаатар хотын түгжрэл, агаар, хөрс, усны бохирдол засаж болохооргүй болох гээд байгаа юм. Тиймээс бид Улаанбаатар хотод авто машины дугаар олголттой холбоотой зохицуулалтыг НИТХ хийнэ. Үүний дараа нийтийн тээврийн шинэчлэлийг бүрэн утгаар нь хийнэ. Ингээд төлбөртэй бүс тогтоовол ямар байх вэ гэдгийг НИТХ үе шаттай шийднэ. Нийслэлийн Засаг дарга, ИТХ энэ хуулиар эрх авах юм.
УИХ-ын гишүүн Д.Тогтохсүрэн: Бид өнөөдөр энэ хуулийг гаргахгүй бол маргааш бүр таг болсон хойно нь л ярих болно. Хамгийн том зүйл бол орон сууцжуулах. Ингэхэд дэд бүтэц хамгийн чухал. Орон сууцжуулахад дэд бүтэц байгаа юу. Хоёрт, иргэдийн худалдан авах чадвар. Гэр хорооллын иргэд орон сууцанд орохыг хүсч байгаа боловч худалдан авах чадвараасаа болоод орж чадахгүй байгаа. Тиймээс хот орон сууцны өөр хөтөлбөр хэрэгжүүлэх төлөвлөгөө байгаа юу.
Төлбөртэй бүсийг бий болгосноор түгжрэлийг ямар хэмжээнд буурна гэж тооцсон бэ. Сөрөг үр дагавар нь юу вэ. Монгол Улс цаашдаа хоёр бүртгэлтэй болох юм байна. Улсын хэмжээний авто тээврийн бүртгэл, нийслэлийн бүртгэл. Энэ хоёрын хоорондын үнэ татвар өөр болох нь.
Нийслэлийн Засаг дарга Х.Нямбаатар: Улсын авто машины бүртгэл хоёр тусдаа болохгүй. Зөвхөн НИТХ Улаанбаатарт олгогдох авто машины дугаарын дээд хязгаарыг тогтоож өгнө. Бүртгэлийг Авто тээврийн үндэсний төв хийнэ. Нийслэлийн авто тээврийн хэрэгслийн дугаар шилжилтийн журмыг мөн НИТХ тогтооно.
Сэлбэ, Баянхошуу дэд төвүүд дээр 20 мянган айлын орон сууцны төслийг хэрэгжүүлнэ.
Эхний 12 мянган айлын орон сууцыг нийслэл газрыг орон сууцаар солих нөхцөлтэй барина. Үүнээс 600 орчим га газрын нийслэл өөр дээрээ аваад эргүүлээд барилгын компаниудад дуудлага худалдаагаар зарна. Үүний үр дүнд гэр хорооллын 50 өрхийг орон сууцанд оруулна.
