УИХ-ын чуулганы нэгдсэн хуралдаан үргэлжилж байна. Хуралдаанаар Гэр бүлийн тухай хуулийн шинэчилсэн найруулгыг хэлэлцэж байна.
Манай улсад арван гэр бүл шинээр батлуулахад дөрвөн гэр бүл салж байна. Салалт жил бүр нэмэгдэхийн сацуу салж буй гэр бүлийн нас залуужиж байгаа аж. Салсан гэр бүлүүдээс судалгаа авахад тааламжгүй харилцаатай байсан, эдийн засгийн шалтгаантай буюу өөрсдийн гэх байргүй, орлогогүй байсан гэж дийлэнх нь хариулжээ. Иймд социологичид, сэтгэл судлаачид энэ асуудлыг гүн рүү нь орж судлах, залуу гэр бүлүүдэд сургалт явуулах шаардлагатайг УИХ-ын гишүүн М.Оюунчимэг онцлов.
Мөн тэрээр гэр бүл салсны дараа эмэгтэйчүүд санхүүгийн баталгаагүй болох нь түгээмэл байна. Гэр бүлийн хүчирхийлэлтэй орчинд яагаад эмэгтэйчүүд тэвчээд амьдраад байна гэхээр очих өөр газаргүй байдаг гэв. Одоогоор манай улсад салалтын дараа гэр бүлийн эд хөрөнгө хуваарилах асуудлыг Иргэний хуулиар шийддэг. Гэр бүлийн хуулийн шинэчилсэн найруулгад Гэрлэлтийн гэрээ байгуулах тухай зааж байгаагаараа онцлог юм. Энэ гэрээг эд хөрөнгийн маргаанаас урьдчилан сэргийлэх зорилгоор байгуулдаг олон улсын жишиг байдаг аж.
2022 онд манай улсад 17 мянган гэр бүл бүртгүүлжээ. Нийт салалтын 30 хувь нь арав хүртэл жил хамт амьдарсан бол 70 хувь нь үүнээс олон жил хамт амьдарсан гэр бүл байна.
“Нууц амраг, араар тавилтын улмаас жилд 6000 гэр бүл салдаг. Үүний уршгаар арван мянга орчим хүүхэд өнчирч хоцордог. Энэ хуульд эхнэр нөхөр бие биедээ үнэнч байна гэжээ. Тэгэхээр үнэнч биш байвал хууль зөрчсөнд тооцогдох юм байна. Зүв зүгээр амьдарч байсан гэр бүлийг үймүүлсэн юу нууц амрагт хуулиар ямар хариуцлага тооцох вэ” гэж УИХ-ын гишүүн Б.Пүрэвдорж асуув.
Энэ талаар хуульд дараах байдлаар зохицуулжээ. Нэр хүнд нь гэм хор учирсан гэж үзсэн эхнэр эсвэл нөхөр хохирлоо нэмэмжлэх, гэм хор учруулсан хүн хохирлыг барагдуулах үүрэгтэй гэж заажээ.
Ажлын хэсгийн гишүүн н.Амарсанаа “Гэр бүлийн гадуурх харилцаанаас болж гэр бүл салбал Эрүүгийн хариуцлага хүлээлгэх уламжлал бусад улсад бий. Эрүүгийн хариуцлагыг төрийн бодлогоор, хүний суурь эрхэд халдсан тохиолдолд л хүлээлгэдэг. Хамгийн ёүүлд БНСУ 2015 онд Үндсэн хуулийн дагуу энэ талаарх заалтыг хүчингүй болгож, хүний суурь эрхэд халдсан гэж үзжээ. Өөрөөр хэлбэл нууц амрагт, нууц амрагтай болсон эхнэр эсвэл нөхөрт эрүүгийн хариуцлага хүлээлгэхгүй болсон. Эдийн бус гэм хорыг төлүүлэх хуулийн орчин манай улсад бүрэлдсэн тул хохирогч тал шүүхэд нэхэмжлэл гарган, гэр бүлтэйг нь мэдсээр байж гэдэг үндэслэлээр шүүхэд хандаж болно” гэв.
ХЗДХ-ийн сайд Б.Энхбаяр “Хайрыг хуульчилж болохгүй. Энэ бол ёс суртахууны асуудал юм” гэв.
