УИХ дахь МАН-ын бүлгийн ээлжит хуралдаанаар хэвлэл мэдээллийн сайтыг хаасан, томуу, томуу төст өвчин нэмэгдэж буйтай холбоотой асуудлыг хэлэлцэж мэдээлэл хийлээ.
Н.Учрал: Зариг.мн сайтад Монгол Улсаас хандах боломжгүй болсон
Эрүүгийн хэрэг хянан шийдвэрлэх тухай хуульд заасны дагуу хууль хяналтын байгууллага шалгаж байгаа тохиолдолд прокурор зөвшөөрсөн бол тухайн байгууллагад Харилцаа холбооны зохицуулах хороонд тодорхой хязгаарлалт хийхийг даалгадаг. Тэгэхээр зохицуулах хороо бол хуулийг хэрэгжүүлэх л байгууллага. Прокурорын байгууллага зөвшөөрөөд, даалгаад, цагдаагийн байгууллагад хүсэлт гаргасан бол хурдан хугацаанд тусгай зөвшөөрөл олгосон байгууллагууд руу мэдэгдэл явуулдаг. Жишээлбэл, олон нийтийн сүлжээний бүх төрлийн платформуудаар сая хаагдсан зариг.мн сайт үйл ажиллагаа нь явж л байгаа. Зөвхөн монголоос хандах хандалт буюу Монголд байршиж байгаа сервер дээр л тодорхой хязгаарлалт хийдэг хуулийн зохицуулалттай юм байна.
Гэтэл иргэд үүнийг Засгийн газар шийддэг юм шиг тайлбарлаад байдаг. Яг үнэндээ хууль хяналтын байгууллагын мөрдөн шалгах ажиллагаанд саад тотгор учруулж байгаа асуудалд хэн нэгэн хүн орох ямар ч эрх байхгүй. Тэгэхээр иргэний хууль хяналтын байгууллагаар шалгагдаж байгаа асуудал дээр бид ямар нэг тайлбар хийхгүй. Бид мэдэхгүй. Харин үгээ хэлэх, үзэл бодлоо илэрхийлэх бол ардчиллын амин сүнс. Өнгөрсөн хугацаанд 6868 домэйн дээр зохицуулах хороо хязгаарлалт хийсэн. Ер нь цаашид хэвлэл мэдээллийн байгууллагынхаа эрх чөлөөг илүү баталгаажуулах хэрэгтэй. Энэ бол Монгол Улсын иргэн бүрийн асуудал. Манай нам, Ерөнхий сайдын зүгээс хэвлэлийн эрх чөлөөгөөр баталгаажуулах, үгээ хэлэхийг хүндэтгэх асуудлыг илүү цогц утгаар нь харъя гэж байгаа. Хэвлэлийн эрх чөлөөнд халтай зохицуулалтыг хууль эрх зүйн орчныг сайжруулах ёстой. Үүнийг эргэж харахын төлөө өнгөрсөн хугацаанд ажилласан бол одоо илүү ажил хэрэг болгоё гэдэг рүү чиглэж байна. Өнгөрсөн таван сарын хугацаанд Харилцаа холбооны тухай хуульд нэмэлт өөрчлөлт оруулах ажлын хэсгийг манай дэд сайд ахлан ажиллаж байсан. Тэгэхээр бид ойрын хугацаанд Харилцаа холбооны тухай хуульд тодорхой өөрчлөлтийг тусгаж илүү үгээ хэлэх эрх чөлөөг баталгаажуулах дээр онцгой анхаарна.
