Монголын Үйлдвэрчний Эвлэлийн Холбоо (МҮЭХ) түрээсийн төлбөрөө төлөөгүй гэх шалтгаанаар ахмадын холбоогоо хөөжээ. Тэд ахмадын холбоогоо “Шүүхийн шийдвэр гарсан тул түрээсийн мөнгө төл, үгүй бол гар” гэх шаардлагыг тавьсан аж.
Энэ талаар МҮЭХ-ны гишүүн байгууллага болох ахмадын холбооны тэргүүн С.Баяраа сэтгүүлчдэд мэдээлэл өглөө.
Тэрбээр “МҮЭХ-ны Ерөнхийлөгч С.Эрдэнэбат, дэд Ерөнхийлөгч Б.Рагчаа тэргүүтэй хүмүүс манай холбооны үйл ажиллагааг сайжруулна гэж амлалт өгсөөр хоёр жил болж байна. Анх Монголын Тээвэр Холбоо Газрын тосны ҮЭ-ийн дарга байхдаа сонгуулиар булхайцаж, холбооны удирдлагыг гартаа авсан.
Монголын үйлдвэрчний эвлэлүүдийн холбооны дүрэмд зааснаар бүх холбоод тэгш эрхтэй байх ёстой. ҮЭ-ийн нийт 14 холбоо бий. Эдгээрээс аль нь ч түрээсийн төлбөр төлдөггүй. Гэтэл ахмадын холбоо болон хөдөлмөрчдийн эв нэгдэл гэсэн хоёр байгууллагыг нийт 37 сая төгрөгийн түрээс төлөхийг шаардсан.
Үйлдвэрчний эвлэлийн үе үеийн дарга нарын авлига, хулгайн асуудлыг ярихаар буруудаж, биднийг замаасаа зайлуулахаар улайрч байна. Татвар төлөгчдийн мөнгөөр хувьцаа худалдаж авсан, Үйлдвэрчний эвлэлийн нэр дээр байсан газруудыг зарж, борлуулсан олон асуудал бий.
Мөн энэ байгууллагын нэр дээр байсан Замын цагдаагийн зүүн талд байршилтай газрыг 118 айлын орон сууцаар зарсан юм. Гэтэл эдгээр байрыг удирдлагууд өөрсдийнхөө холбооны хүмүүст хуваарилсан. Энэ орон сууцнаас УИХ-ын гишүүн С.Ганбаатар 15 орон сууц авчхаад одоог хүртэл мөнгийг нь төлөөгүй. Түүнчлэн найман байрыг юунд зарцуулсан нь тодорхойгүй шалтгаанаар алга болчхоод буй. Энэ мэт олон асуудлаас болоод ахмадуудыг хөөж гаргахыг санаархаж байна” гэж ярилаа.
Тус холбооны нэр дээр байсан Сонгинын амралтын газар, МҮЭСТО-ны ойр орчмын газруудыг мөн борлуулж, үндэслэлгүйгээр хөрөнгөжсөн асуудал ч байгааг онцлов.
