Засгийн газрын өнөөдрийн хуралдаанаар ослоос болж иргэдэд учирсан хохирлыг Засгийн газрын нөөц хөрөнгөнөөс гаргахаар шийдвэрлэжээ. Хуралдаанаас гаргасан шийдвэрийг Шадар сайд С.Амарсайхан танилцуулж байна.
Тэрээр,
“Баянзүрх дүүргийн 26-р хорооны нутаг дэвсгэрт гарсан осолтой холбоотойгоор Засгийн газраас тодорхой таван асуудлаар шийдвэр гаргалаа.
Нэгд, алба үүргээ гүйцэтгэж яваад амиа насаа алдаж, эрсдэлд орсон ОБЕГ-ын алба хаагчдын ар гэрт олгох мөнгөн тусламж, тэтгэмжийн асуудлыг шийдлээ. Хоёрт, осол гэмтлийн улмаас түлэгдэж, угаартаж эмнэлэгт эмчилгээ хийж байгаа иргэдийн эмчилгээнд зориулж тодорхой санхүүжилт олгож, ар гэрт нь дэмжлэг олгох асуудлыг шийдсэн. Гуравт, 60 айлын орон сууц галд өртсөн. Эдгээр өрхийн иргэд өнөөдөр зочид буудалд амьдарч байгаа. Энэ орон сууцыг засах зардлыг Засгийн газрын нөөц хөрөнгөөс гаргахаар шийдлээ. Дөрөвт, мэргэжлийн дүгнэлт дээр үндэслэн барилгын компаниудаар засвар хийлгэнэ. Байр засагдаж дуусах хүртэл тухайн орон сууцанд амьдарч байсан айл өрх иргэдийн түрээсийн байрны зардлыг Засгийн газар шийдлээ. Тавд, осол гэмтэл гаргасан шалтгааныг мэргэжлийн болон Цагдаагийн байгууллага шалгаж байна. Мэргэжлийн болон хуулийн хүрээнд шалгаж дүгнэлт гарсны дараа холбогдох байгууллага мэдээлэл хийнэ.
Газ тээвэрлэж байсан машин яагаад зөвшөөрөлгүй, бүртгэлгүй байсан бэ. Яагаад аюулгүй тээвэрлэлт хийж явуулаагүй байсан бэ гэдэг асуудлууд хөндөгдөж байна. Мөн тухайн ойр орчмын орон сууцны орц гарц ямар байсан. Стандартын дагуу явсны гэдэг асуудал яригдана.
Ер нь осол гаймшгийн асуудлыг нэг, хоёр тохиолдлыг авч үзээд, тухайн үеийн шуугианыг дарах байдлаар явдаг хандлага бүх салбарт байна. Иймд, стандарт хэм хэмжээ гэдэг зүйлээ мөрдөцгөөе, хэвшил болгож сурцгаая. Стандартыг дагаж мөрдөж ниймгийн үйл хэрэг болгох тал дээр анхаарч ажиллах Ажлын хэсэг байгууллаа. Ажлын хэсэг стандарт дүрэм журмыг бүх шатан мөрдүүлэх, шинэчлэх өөрчлөх шаардлагатай бол холбогдох арга хэмжээг авч ажиллах үүрэгтэй ажиллана. Энэ Ажлын хэсэгт бүх салбарын эрдэмтэн судлаач, мэргэжлийн хүмүүс багтана” гэлээ.
Мөн тэрээр “Газ тээвэрлэж явсан автомашин яагаад бүртгэлгүй, зөвшөөрөлгүй байсан юм бэ гэдэг асуудал яригдаж байна. Аюулгүй тээвэрлэх зориулалтын автомашин байсан уу. Хэрэв тийм бол яагаад бүртгэлгүй, зөвшөөрөлгүйгээр их хэмжээний шатах, тэсрэх бодис тээвэрлэж явсан бэ гэдэг асуудал хөндөгдөж байгаа. Орон сууцны орц, гарцаар гал унтраах автомашин орох боломж яагаад бүрдээгүй байсан бэ гэдэг асуудал хөндөгдөж байна” гэв.
Онцгой байдлын ерөнхий газрын дарга Г.Ариунбуян “газ тээвэрлэж яваад осол гаргасан “Дашваанжил” компанийн нэр дээр бүртгэлтэй дээрх автомашин нь шатах тослох материал тээвэрлэх зөвшөөрлийг аваагүй байсан нь хуулийнхны шалгалтаар тодорхой болсон” гэлээ.
Мөн хэргийг шалгаж байгаа цагдаагийн байгууллагын холбогдох албан тушаалтан “Хоёр жолоочийг шүүхийн зөвшөөрөлтэйгээр 48 цагийн хугацаатай баривчилсан. Ослын улмаас гурван хүний амь нас хохирсон, 10 хүн бэртэж гэмтсэн, орон сууц галд өртсөн, их хэмжээний хохирол учирсан зэргийг харгалзан үззэж, бусдын болон өөрсдийн амь насанд хохирол учруулж болзошгүй нөхцөл байдал үүссэн тул прокурорт хандаж, хоёр жолоочийг таслан сэргийлэх арга хэмжээг авсан” гэлээ.
