Гурван өдөр үргэлжлэх ОХУ-ын ерөнхийлөгчийн сонгуулийн санал хураалт өчигдөр буюу Баасан гарагт эхэллээ.
Энэ өдөр санал хураалтын үйл ажиллагааг тасалдуулах зорилготой хэд хэдэн халдлага гарсан байна.
Тухайлбал Оросын дөрвөн бүс нутагт санал хураалтын байранд гал тавих, долоон бүс нутагт саналын хайрцагт будаг асгах халдлага гарчээ.
Нийслэл Москва хотын нэг сонгуулийн тойргийн санал хураах байранд гал тавьсан өндөр настан эмэгтэйг эрх баригчид саатуулан шалгаж эхэлсэн байна. Санкт Петербург хотод нэгэн залуу эмэгтэй санал хураах байр руу шатагч шингэнтэй лонх шидээд баривчлагджээ.
Ханты-Мансийск автономит тойрогт нэг эмэгтэй саналын хайрцгийг галдан шатаахыг оролдсон бол Москвад бас ижил халдлага гарсан байна.
Үүнээс гадна оросуудын “зелёнка” гэж нэрлэдэг ногоон будгийг саналын хайрцаг руу асгах халдлагууд гарчээ. 2010-аад оны үед сөрөг хүчний идэвхтнүүд рүү ийм будаг цацах явдал олон гардаг байв.
Тухайлбал Ростов мужид ийм халдлага үйлдсэн 62 настай эрэгтэйд сонгуулийн үйл ажиллагаанд саад учруулсан хэрэг үүсгэн шалгаж байгааг орон нутгийн эрх баригчид мэдээлсэн байна. Ийм төрлийн гэмт хэрэгт тав хүртэл жил шоронд хорих ял оноодог.
Воронеж мужийн Борисоглебск хотод ийм төрлийн хоёр халдлага гарчээ. Будгаар сүйтгэгдсэн саналын хуудаснуудыг тоолох эсэхийг Ням гарагт санал хураалт дууссаны дараа шийдвэрлэхээр болсноо орон нутгийн эрх баригчид мэдээлсэн байна.
Москва хотод 20 настай эмэгтэй саналын хайрцаг руу будаг асгаж буйг харуулсан дүрс бичлэг Оросын сошиал ертөнцөд өчигдөр тарсан юм.
Крымийн хойгт ийм төрлийн халдлагын улмаас зургаан хайрцагтай саналын хуудаснууд гэмтжээ. Волгоград мужид бас нэг ийм халдлага гарсан байна.
Өчигдөр Орос даяар нийтдээ 13 хүнийг санал хураах байранд хорлон сүйтгэх ажиллагаа явуулсан хэргээр баривчилснаа эрх баригчид мэдээлжээ.
ОХУ-ын Сонгуулийн Төв Хорооны тэргүүн Элла Памфилова ийм халдлага үйлдсэн иргэдийг бусдын амласан мөнгөнд хууртсан, хийсэн үйлдэл нь ял шийтгэлтэйг мэдээгүй гэж тайлбарласан байна.
Эх сурвалж: The Moscow Times
