Өнгөрсөн амралтын өдрүүдэд Сонгинохайрхан дүүргийн 32 дугаар хороо Эмээлт дэх “Монгол бугат тал нутгийн хүнс” ХХК-ийн үйлдвэрт их хэмжээний махыг бохир орчинд бэлтгэн савлаж байна гэх мэдээлэл олон нийтийн сүлжээгээр цацагдсан.
Уг асуудлын талаар Цагдаагийн байгууллага болон Нийслэлийн мал эмнэлгийн газраас тодрууллаа.
Нийслэлийн мал эмнэлгийн газрын мал эмнэлгийн хяналтын улсын байцаагч Д.Нямдорж, Б, Сувд-Эрдэнэ нар тус үйлдвэрт шалгалтаар очиход:
- Усанд сойсон мах,
- Гэсгээж байгаа мах,
- Үхрийн булчин мах,
- Амталсан мах,
- Вакуумдсан бөөрөнхий мах (шошгогүй),
- Шил, шандас,
- Нэгдүгээр хөргүүрийг иргэн н.Далайд түрээсэлсэн гэж хэлэн 50 тонн богийн гулууз
- Хоёрдугаар хөргүүрт хагас боловсруулж вакуумдаж савласан шошгогүй мах тус тус байжээ.
Нийслэлийн мал эмнэлгийн хяналтын ахлах байцаагч н.Нямбаатар “Тухайн үйлдвэрийн махнаас дээж аван өнөөдөр шинжилж байна. Шинжилгээний хариу 72 цагийн дараа гарна. Мах өмхийрсөн муудсан эсэхийг шинжилгээ авч л тогтоох бөгөөд байцаагчийн дүгнэлтээр тогтоох боломж байхгүй. Эхний арга хэмжээ буюу үйлдвэрийг битүүмжилж, зөрчлийн хэрэг нээх саналыг прокурорын байгууллагад өгсөн. Шинжилгээний хариунд үндэслэн ямар арга хэмжээ авах нь тодорхой болно. Цаашид энэ хэргийг Нийслэлийн мал эмнэлгийн газар, Цагдаагийн байгууллага, Прокурорын байгууллага хамтран шалгах болно” гэлээ.
Махны хэмжээг тодорхойлох боломжгүй тул үйлдвэрт байгаа махны төрөл тус бүрээс нийт долоон дээж авч, үйлдвэрийн есөн хаалгыг лацдаж дээжийг нийслэлийн мал эмнэлгийн газарт хүргүүлжээ.
“Монгол бугат тал нутгийн хүнс” нь гадаадын хөрөнгө оруулалттай хязгаарлагдмал хариуцлагатай компани бөгөөд БНХАУ-ын иргэн Yin Yonggang эзэмшдэг байна.
Эх сурвалж: opendatalab.mn
Цагдаагийн Хэвлэл Мэдээллийн төвийн дарга Б.Батзориг “Тухайн өдөр цагдаагийн байгууллагад дуудлага мэдээлэл бүртгэгдсэний дагуу СХД-ийн Эмээлт дэх үйлдвэрт ажилласан. Хяналт шалгалт үргэлжилж байгаа бөгөөд цагдаагийн байгууллагаас зөрчлийн хэрэг эсвэл гэмт хэргийн шинжтэй эсэхийг тогтоож прокурорын байгууллагад шилжүүлнэ. Хуулийн хүрээнд Нийслэлийн мал эмнэлгийн газраас шалгаж прокурорын байгууллагад мэдээлэл хүргүүлэх болно” гэв.
Нийслэлийн мал эмнэлгийн газрын дарга М.Түмэннаст “Манай байгууллагаас тус үйлдвэрт байсан махнаас дээж авч шинжилсэн. Шинжилгээний хариу гараагүй байна. Уг үйлдвэр тусгай зөвшөөрөлтэй эсэхийг ХХААХҮЯ хариуцдаг учир мэдэхгүй байна” гэлээ.
Бид ХХААХҮЯ-ны хэвлэлийн ажилтан х.Энхжаргалаас тус үйлдвэр тусгай зөвшөөрөлтэй эсэхийг асуухад холбогдох ажилтнаас тодруулан эргэн мэдэгдэх болно гэлээ.
