НЗДТГ, НҮБ-ын Хөгжлийн хөтөлбөртэй хамтран “Гэр хороололд сэргээгдэх эрчим хүчний шилжилтийг дэмжих замаар амьжиргааг нэмэгдүүлэх төсөл”-ийг хэрэгжүүлж буй. Энэ хүрээнд эрчим хүчний шилжилт хийх өрхүүдийг шалгаруулна.
Уг төсөлд хамрагдсанаар өрхүүд гэрээ дулаалж, цахилгаан халаагуур, нарны буюу сэргээгдэх эрчим хүчинд холбогдох боломжтой.
Төслийн эхний ээлжид Сонгинохайрхан дүүргийн гэр хорооллын бүс дэх өрхүүдийг хамруулсан. Хоёрдугаар ээлжийг Чингэлтэй, Сүхбаатар дүүрэгт хэрэгжүүлнэ. Чингэлтэй дүүргийн 7, 12, 13, 14, 16, 20, 21, 22 дугаар хороо, Сүхбаатар дүүргийн 13, 15, 16 дугаар хорооны айлуудыг хамруулна.
Нийслэлийн Засаг даргын Нийгмийн салбар, ногоон хөгжил болон агаар, орчны бохирдлын асуудал хариуцсан орлогч О.Номинчимэг “Энэ төсөл иргэдийн эрүүл мэнд, өрхийн эдийн засаг болон агаар, орчны бохирдлыг бууруулахад өндөр ач холбогдолтой. Нүүрс, шахмал түлшний хэрэглээг халснаар өрхүүдийн зардлыг хэмнэнэ.
Нарны эрчим хүч ашиглан, батарей хураагуурт эрчим хүч хурааснаар айлууд оройн цагаар ачаалалтай үед үүнийг ашиглах боломжтой. Нийгмийн хүртээмжтэй байдлыг хангах үүднээс өрх толгойлсон эх эсвэл эцгийг төсөлд хамруулна” хэмээв.
Төсөлд хамрагдах өрхөд тавигдах шаардлага:
- Өрх толгойлсон эцэг эсвэл эх байх;
- Өрхийн нэгээс доошгүй гишүүн тогтмол орлоготой байх;
- Таван ханатай монгол гэрт амьдардаг бөгөөд гурван давхар эсгий дээвэр, туургатай байх;
- Газар нь өөрийн эсхүл гэр бүлийн гишүүний нэр дээр бүртгэлтэй, үл хөдлөх хөрөнгийн гэрчилгээтэй байх;
- Хашаандаа байнга оршин суудаг байх;
- Тухайн байршилд цаашид таван жил тогтвортой амьдрах төлөвлөгөөтэй байх.
Төсөлд хамрагдах хүсэлтэй иргэд, айл өрхүүд харьяа хороондоо хандаж эсвэл https://forms.gle/ZM2mEy8krLQDYb9C8 цахим холбоосоор нэвтрэн хүсэлтээ өгөх боломжтой. Хүсэлтийг дөрөвдүгээр сарын 1 хүртэл хүлээн авна.
НЗДТГ-ЫН ХЭВЛЭЛ МЭДЭЭЛЭЛ, ОЛОН НИЙТТЭЙ ХАРИЛЦАХ ХЭЛТЭС
