“Цэнхэр дуулгатан”-ууд тусгаар тогтнол, аюулгүй байдлаа бэхжүүлдэг

 

Монголын медиа корпорациас санаачлан хэрэгжүүлж буй \”Ардын үг\” иргэдийн зөвлөлдөх аян үргэлжилж байна. Энэ удаагийн аянаар Монгол Улсын Ерөнхийлөгч Ц.Элбэгдоржийн өнгөрсөн найман жилийн хугацаанд хийж хэрэгжүүлсэн ажил, санаачлага зэргийг ард түмнээр дүгнүүлэхээр болсон. Учир нь 2017 он бол Ерөнхийлөгчийн хуулиар олгогдсон бүрэн эрхийн хугацаа дуусгавар болох жил юм.

\”Ардын үг\” зөвлөлдөх аяны хувьд онцлогтой. Юу гэвэл, аливаа улстөрч, төрийн томилогдсон болон сонгогдсон албан тушаалтны хийсэн ажилд ард түмнээр дүн тавиулахдаа юун түрүүнд иргэдийг мэдээллээр хангадаг юм. Ингэснээр тодорхой зөв, бодит мэдээлэл авсан иргэд аливаа асуудалд ул суурьтай хандаж дүгнэлт хэлдэг аж.

Энэ жишгийн дагуу \”Монголын медиа корпораци\” Ерөнхийлөгчийн өнгөрсөн найман жилийн хугацаанд хийсэн онцлох ажлууд, санаачлагуудыг тоймлон иргэдэд хүргэж байгаа билээ. Өмнө нь Ерөнхийлөгчийн гадаад бодлого, хөрш орнуудын харилцаа, АСЕМ-ын дээд хэмжээний уулзалтын талаарх мэдээллийг хүргэсэн бол энэ удаа Монгол Улс энхийг дэмжих ажиллагаанд хэрхэн оролцдог, энхийг дэмжих ажиллагаанд оролцох нь ямар ач холбогдолтой талаарх мэдээллийг бэлтгэлээ.

2012 оноос хойш нэг жилд дунджаар 1500 алба хаагч Монгол Улсаа төлөөлөн энхийг дэмжих ажиллагаанд оролцож байна

Монгол Улсын хувьд анх 2002 онд хоёр алба хаагчийг Конго улсад энхийг дэмжих ажиллагаанд илгээснээр энэхүү үйл ажиллагаанд оролцож эхэлсэн юм. Түүнээс хойш 15 жил тасралтгүй оролцож байна. 15 жилийн хугацаанд давхардсан тоогоор нийт 14 мянга 148 алба хаагчийг хилийн чанадад илгээж, энхийг дэмжих ажиллагаанд оролцжээ.

Тодруулбал, манай улсаас 2002-2008 онд энхийг дэмжих ажиллагаанд нийт 2978 алба хаагч оролцсон байдаг. Харин сүүлийн найман жилийн хугацаанд энэ тоо дөрөв дахин ихэсч 11178-д хүрчээ. Мөн 2012 оноос хойш нэг жилд дунджаар 1500 алба хаагч Монгол Улсаа төлөөлөн энхийг дэмжих ажиллагаанд оролцдог аж.

Тэгвэл энхийг дэмжих ажиллагаанд оролцох нь ямар ач холбогдолтой вэ. Энэ талаар хурандаа Ж.Молорболд \”Энхийг дэмжих ажиллагаанд оролцох нь улс төр, дипломатын аргаар тусгаар тогтнол, аюулгүй байдлаа бэхжүүлж байгаа юм\” хэмээн хэллээ. Мөн түүний хэлснээр манай улсаас АНУ, Итали, БНХАУ, Герман зэрэг улсад цөөнгүй тооны хүн энхийг сахиулах ажиллагаа болон цэрэг армийн бусад чиглэлээр суралцдаг ажээ. Түүнээс гадна энхийг дэмжих ажиллагаанд оролцсон цэргийн алба хаагчдын нийгмийн асуудалд зориулан НҮБ-аас анх 1028 ам.доллар олгодог байжээ. Харин 2016 оны долдугаар сард 1335 ам.доллар болгож нэмсэн байна. Ирэх долдугаар сараас энэ мөнгө 1735 ам.доллар болох аж. Мөн энхийг дэмжих ажиллагаанд оролцсон алба хаагчдын энэхүү мөнгөний 60 хувийг өөрт нь, 40 хувийг Монгол Улсын зэвсэгт хүчинд хуваарилагддаг байжээ. Харин 2011 онд Засгийн газар шийдвэр гарган 70 хувийг алба хаагчид, үлдсэн 30 хувийг Зэвсэгт хүчинд өгөхөөр болсон юм.

Тэгвэл Монгол Улс энхийг дэмжих ажиллагаанд хэрхэн оролцдог вэ. Энэ талаар Зэвсэгт хүчний 311-р ангийн Штабын дарга, дэд хурандаа Р.Энхболдтой цөөн хором ярилцлаа.

Ярилцлагыг энд дарж уншина уу.