УИХ-ын 2024 оны сонгууль болоход 20 хоногийн хугацаа үлдээд байна. СЕХ-ноос УИХ-ын 2024 оны сонгуульд албан ёсоор нэр дэвшигчдийг бүртгэж дууссан бөгөөд энэ сарын 10-нд нэр дэвшигчдийг зарлах юм. Тэгвэл МАН-ын жасгаалтын 9 дүгээрт бичигдсэн МҮХАҮТ-ын Ерөнхийлөгч Д.Энхтүвшин нэрээ татах шийдвэр гаргасан байх магадлалтай байна. Тэрбээр, өнөөдөр /2024.06.07/-нд өөрийн албан ёсны цахим хуудсаараа дамжуулан “Сонгуулийн өмнө тухайлан зарим хувийн компаниудын өмч хөрөнгийн эрх, хөдөлгөөнийг “улс төрийн” шинжтэй хязгаарласаар байхад хувийн хэвшлийн эрх ашгийг хамгаалах ёстой байгууллагыг удирддаг хүний хувьд эрх барьж буй намаас сонгуульд нэр дэвших нь ёс зүйгүй санагдаж байна” гэж мэдэгдлээ.
Сүүлийн үед “Монполимет групп”-ын захирал Ц.Гарамжавыг 48 цаг саатуулан баривчилсан нөхцөл байдалд олон нийт, хувийн хэвшлийнхэн төдийгүй зарим улс төрчид ч ихээхэн шүүмжлэлтэй хандсан. Улмаар түүнийг яллагдагчаар татан, хилийн хориг тавьж, тодорхой хүмүүстэй уулзахыг хориглоод буй юм. Үүнтэй холбогдуулан хувийн хэвшлийнхний үйл ажиллагааг хааж, боомилж байна гэх шүүмжлэл нийгэмд багагүй өрнөсөн. Зарим УИХ-ын гишүүд уг асуудалтай холбоотойгоор УИХ-ын чуулганы хуралдааны үеэр байр сууриа илэрхийлсэн. Тухайлбал, УИХ-ын гишүүн Б.Пүрэвдорж чуулганы танхимд “Хэдэн төгрөг олж ирдэг бизнесийнхнээ дарамталдаг байдал хэрээс хэтэрлээ. Ц.Гарамжав гуайг хорьчихсон байна шүү дээ. Гэтэл МҮХАҮТ-ын дарга нь бизнесийнхнийг нь дарамталдаг намын жагсаалтад ороод нуугдчихсан байна” хэмээн жагсаалтад багтсан “Шарк” Д.Энхтүвшинг шүүмжилсэн удаатай. Тэгвэл МҮХҮАТ-ын Ерөнхийлөгч Д.Энхтүвшин МАН-ын жагсаалтаас нэрээ татсан эсэх нь удахгүй тодорхой болох нь.
