Япон Улсын Засгийн газрын санхүүгийн дэмжлэгээр НҮБ-ын Хүүхдийн сангаас хэрэгжүүлж буй “УБ хотын үерийн эрсдэлтэй бүсэд нийгмийн эрүүл мэндийг хамгаалж ус хангамж, ариун цэвэр, эрүүл ахуйн байдлыг сайжруулах нь” төслийн хүрээнд ОБЕГ-т гурван ширхэг өндөр хүчин чадал бүхий үерийн ус зайлуулах насосыг өнөөдөр хүлээлгэн өглөө.
Эдгээр бүрэн автомат насосууд нь түлш бага зарцуулдаг, хөдөлгүүрийн хэмжээ авсаархан бөгөөд удаан хугацаанд хуурай ажиллах чадвартайгаас гадна секундэд 58 литр ус соруулах хүчин чадалтай аж.
Энэхүү төслийн хүрээнд эдгээр хүнд даацын усны насос нийлүүлээд зогсохгүй үерийн эрсдэлтэй бүсэд 18 ус хангамж, ариун цэвэр, эрүүл ахуйн байгууламж барьж, төрийн 100 албан хаагч болон эрүүл мэнд, боловсролын салбарын 1000 мэргэжилтнүүдийн чадавхыг бэхжүүлэх юм.
Арга хэмжээний үеэр НҮБ-ын Хүүхдийн Сангийн Монгол дахь Суурин төлөөлөгч Эваристе Коуасси-Комлан “Уг төслийн хүрээнд техник хэрэгслийг хүчитгээд зогсохгүй алба хаагчдын мэдлэг мэдээллийг сайжруулах олон ажлыг хийх болно. Мөн иргэдийн бэлэн байдлыг сайжруулахад анхааран ажиллаж байна.
Өнгөрсөн зуны үерээс шалтгаалан иргэдэд маш их хохирол учирсан. Тэр дундаа хүүхдүүдэд хор хөнөөл учирсанд НҮБ-ын Хүүхдийн сан хариу арга хэмжээ аван анхаарч ажиллав.
Төслийн хүрээнд бид 150 мянга гаруй сургагч багш бэлдсэн.
Мөн эрүүл мэнд, боловсрол, хүүхэд рүү чиглэсэн олон ажлыг хийж байлаа. Япон улсын Засгийн газрын санхүүжилтээр НҮБ-ын Хүүхдийн сангаас хэрэгжүүлж буй уг төсөл Улаанбаатарт учирч болох үерийн эрсдэлийг бууруулахад чухал ач холбогдолтой гэж үзэж байна.
Төслийн хүрээнд бид 150 мянга гаруй сургагч багш бэлдэж, нийслэлийн бүх дүүрэг хороонд ажлаа эхлүүлсэн. Мөн үерийн эрсдэлтэй бүсэд 18 ариун цэврийн байгууламж барьсан. Бид үерийн үед хариу арга хэмжээг түргэн шуурхай авахад зориулсан өндөр хүчин чадалтай гурван ширхэг насосыг хүлээлгэн өгч буйдаа баяртай байна” гэлээ.
Япон Улсын Элчин сайд М.Игавахара “Өнгөрсөн жил их хэмжээний борооорсны улмаас Улаанбаатарт үерийн аюул нүүрлэсэн. Тиймээс Япон улсын Засгийн газраас энэ жил үерийн эрсдэлээс сэргийлэн НҮБ-ын Хүүхдийн сантай хамтарч “УБ хотын үерийн эрсдэлтэй бүсэд нийгмийн эрүүл мэндийг хамгаалж ус хангамж, ариун цэвэр, эрүүл ахуйн байдлыг сайжруулах нь” төслийг хэрэгжүүлж байна.
Төслийн хүрээнд өндөр хүчин чадалтай гурван ширхэг үерийн ус зайлуулах насосыг ОБЕГ-т хүлээлгэн өгч байна. Энэхүү насосыг ашиглаж үерийн эрсдэлийг ихээхэн бууруулна гэж Япон улсын Засгийн газар найдаж байна” гэв.
ОБЕГ-ын дарга Г.Ариунбуян “Өнөөдөр Япон улсын Засгийн газар болон НҮБ-ын Хүүхдийн сангаас өндөр хүчин чадалтай үерийн ус зайлуулах насосуудыг хандивлаж байна. Үер тохиовол хор уршгийг хурдан хугацаанд арилгах, хохирлыг багасгахад чухал нөлөө үзүүлнэ.
Энэхүү насосуудыг үерийн эрсдэл өндөр Туул, Сэлбэ гол дагуух цэгүүдэд байрлуулна. НҮБ-ын Хүүхдийн сангаас хүүхдэд зориулсан газар хөдлөлтийн үеэрх авах арга хэмжээний гарын авлагыг өгсөн. Энэ жил 50 гаруй сургуулиудад тус гарын авлагуудыг тарааж, сургалт орж байна. Энэхүү насос нь манай улсад байхгүй, маш өндөр хүчин чадалтай, чухал үүрэг гүйцэтгэнэ.
Амралт зугаалгын улирал эхэлсэнтэй холбогдуулан иргэн бүр хариуцлагатай байж, хүүхэд, багачуудын аюулгүй байдлыг хангаж анхаарах шаардлагатай байна. Бид үерийн эрсдэлтэй бүсүүдэд суурьшсан иргэдэд нүүх шаардлагыг хүргүүлдэг. Гэвч төдийлөн сайн хэрэгжихгүй байна. Иргэдийн ухамсар хариуцлагаас шалтгаалж үерт өртөх эрсдэл өндөр байгаа юм” гэлээ.
Арга хэмжээнд ОБЕГ-ын дарга, хошууч генерал Г.Ариунбуян, Япон Улсаас Монгол Улсад суугаа Элчин сайд Игавахара Масару, НҮБ-ын Хүүхдийн сангийн Монгол дахь суурин төлөөлөгч Эваристе Коуасси Комлан нар оролцсон юм.
