Гэмтэл согог судлалын үндэсний төвийн захирал Э.Галбадрах болон Яаралтай тусламжийн тасгийн эрхлэгч А.Сэргэлэнхад нар БНСУ-ын Сөүлийн их сургуулийн эмнэлгийн үйл ажиллагаатай танилцаж, хамтын ажиллагааны гэрээ байгууллаа.
Энэ хүрээнд БНСУ-ын эрүүл мэндийн тэргүүлэх чиглэлийн байгууллага болох тус эмнэлэгт гэмтэл согогийн, тэр дундаа Монголд эмчлэгдэх боломжгүй хүнд хэлбэрийн төрөлхийн болон олдмол согогийн оношилгоо, эмчилгээний чиглэлээр эмч, сувилагч, эмнэлгийн мэргэжилтнийг сургаж чадавхжуулах, хамтарсан мэс засал эмчилгээ хийх, судалгаа шинжилгээний ажлыг зохион байгуулахад хамтран ажиллахаар болсон байна.
Төрөлхийн болон олдмол хүнд хэлбэрийн гэмтэл согогийг эмчлэх олон улсын дэвшилтэт арга технологийг эх орондоо нэвтрүүлснээр энэ төрлийн өвчлөлийг эрт үед нь оношлох, эх орондоо бага зардлаар цаг алдалгүй эмчлүүлэх, эмнэлгийн тусламж үйлчилгээний чанар хүртээмжийг нэмэгдүүлэх зэрэг олон талын ач холбогдолтой юм.
Дашрамд сонирхуулахад, БНСУ-ын Сөүлийн их сургуулийн эмнэлэг нь 1800 ортойгоор үйл ажиллагаа явуулж буй бөгөөд нийт 9000 орчим ажилтантай, түүний дотор 2000 орчим эмч мэргэжилтэн жилд гурван сая гаруй үйлчлүүлэгчид тусламж үйлчилгээ үзүүлдэг ажээ. Түүнчлэн боловсрол, эрдэм шинжилгээ, эрүүл мэндийн салбарт био болон дижитал технологийн цогц үйл ажиллагааг нэвтрүүлж, тус улсын анхны мэргэшсэн судалгааны хүрээлэнгээр тодорсон байна.
